Քաղաքական կուսակցությունը հնարավորություն կունենա 2020 թվականի հոկտեմբերին մասնակցել խորհրդարանական ընտրություններին, երբ կհավաքի հինգ հազար ընտրողի ստորագրություն: Համապատասխան փոփոխությունը օրենսդրական փաթեթում կներառվի՝ սահմանադրական փոփոխությունների շրջանակներում: Այս մասին լրագրողներին հայտնել է խորհրդարանական մեծամասնության անդամ և խորհրդարանի նախկին խոսնակ Իրակլի Կոբախիձեն:
Ստորագրահավաքի շեմը 25-ից 5 հազարի իջեցնելու որոշումը կայացվել է այս տարի՝ երկարատև խորհրդատվություններից հետո: Դա հիմնականում կապված է կորոնավիրուսի համավարակի հետ, նշել է պատգամավորը:
Միևնույն ժամանակ, այն քաղաքական կուսակցությունները, որոնք 2018 թվականի ընտրությունների առաջին փուլում առնվազն 15 հազար ձայն էին ստացել, ազատվում են հինգ հազար ստորագրություն հավաքելու պարտականությունից:
Այսպիսով, ստորագրահավաքի կարգը չի վերաբերի շուրջ 22 կուսակցության, 19 որակավորված և լրացուցիչ երեք քաղաքական կուսակցության, որոնք մասնակցել են նախկին խորհրդարանական և տեղական ինքնակառավարման մարմինների ընտրություններին:
Որակավորված ընտրական սուբյեկտը կուսակցություն է, որը վերջին ընտրություններում ստացել է ընտրողների ձայների առնվազն 3%-ը և ֆինանսավորվում է պետական բյուջեից:
Չորակավորված ընտրական սուբյեկտը կուսակցություն է, որը պետությունից սուբսիդավորում չի ստանում:
Կոբախիձեն ընդգծել է, որ ստորագրությունների քանակի ընտրաշեմը կիջեցվի միայն 2020 թվականի ընտրություններին:
«Ինչ վերաբերում է ընտրություններին մասնակցելու քաղաքական կուսակցությունների իրավունքին, ինչպես գիտեք, սահմանադրության հիմնական դրույթները սահմանում են այն նորմը, ըստ որի՝ ընտրություններին մասնակցելու իրավունքն ինքնաբերաբար տրվում է քաղաքական կուսակցությանը, որը խորհրդարանում ներկայացված է ընտրված տեղակալների կողմից: Այլ քաղաքական կուսակցություններից պահանջվում է նաև հավաքել 25 հազար ստորագրություն: Խորհրդակցությունների հիման վրա մենք որոշեցինք մեկ անգամ իջեցնել այդ ընտրաշեմը, ինչը կարող է հատկապես արդիական լինել համավարակի ժամանակ: Քաղաքական կուսակցությունը պարտավոր է հավաքել ընտրողների 5 հազար ստորագրություն, որպեսզի նա մասնակցի հոկտեմբերին կայանալիք խորհրդարանական ընտրություններին», – ասել է Կոբախիձեն:
Հունիսի 21-ին Վրաստանի խորհրդարանն առաջին ընթերցմամբ հաստատել է Սահմանադրության մեջ փոփոխությունները՝ նոր ընտահամակարգով 2020 թվականի հոկտեմբերի 31-ին խորհրդարանական ընտրություններն անցկացնելու մասին: Հաստատված փոփոխությունների համաձայն, խորհրդարանում 150 տեղերից 120-ը բաշխվելու է այն կուսակցությունների միջև, որոնք հավաքել են քվեների ավելի քան 1%-ը, կամ այն դաշինքների միջև, որոնք կկարողանան ստանալ առնվազն նույնքան տոկոս ձայներ, որքան այդ դաշինքում սուբյեկտներ կան: Մնացած տեղերը կբաշխվեն ընտրություններում հաղթողների միջև՝ 30 միամանդատ ընտրատարածքներում: Փոփոխություններին կողմ է քվեարկել 136 պատգամավոր, դեմ` հինգ:
Նյութը՝ «Новости-Грузия»
