Թուրքիայում այսօր անցկացվում է նախագահական ընտրությունների երկրորդ փուլը։
Ընտրատեղամասերը կբացվեն տեղական ժամանակով առավոտյան ժամը 08:00-ին և կփակվեն երեկոյան ժամը 17:00-ին, որից հետո կհրապարակվեն ընտրությունների նախնական արդյունքները։
Երկրորդ փուլում Թուրքիայի 13-րդ նախագահի պաշտոնին հավակնում են երկրի գործող նախագահ Ռեջեփ Թայիփ Էրդողանը եւ միավորված ընդդիմության թեկնածու Քեմալ Քըլըչդարօղլուն։
Երկու թեկնածուներն էլ իրենց վերջին նախընտրական հանրահավաքն են անցկացրել Ստամբուլում։
Նախագահ Էրդողանը քաղաքացիներին խոստանում է շարունակել ընտրած կուրսը և ամրապնդել Թուրքիայի դիրքերը համաշխարհային ասպարեզում։ Ինչպես նաև, որ իր հաղթանակի դեպքում երկրում կբարձրանան քաղծառայողների թոշակներն ու աշխատավարձերը։ Էրդողանը ընդդիմությանը մեղադրում է Թուրքիայում ահաբեկչական ճանաչված «Քրդական աշխատավորական կուսակցությանը» աջակցելու մեջ և նրանց մեղադրում է ոչ կոմպետենտության մեջ։
Երկրորդ փուլի քարոզարշավի ընթացքում Էրդողանը շեշտը դրել է Թուրքիայում Սիրիայից փախստականների խնդիրների լուծման և երկրի էներգետիկ անկախության ամրապնդման վրա։ Թուրքիայի ներկայիս նախագահը ընդդիմությանն անվանում է Արևմուտքի կողմից վերահսկվող և հակառակորդին քննադատում ատելության խոսք օգտագործելու համար։
Միավորված ընդդիմության թեկնածու Քեմալ Քըլըչդարօղլուն նախագահական ընտրությունների երկրորդ փուլից առաջ կրկին խոսել է երկրի տնտեսության մասին։ Նա նաեւ հանդես է եկել երկրում գտնվող փախստականների հայրենիք վերադառնալու պայմանով։ Նա անձամբ Էրդողանին մեղադրել է միգրանտներին Թուրքիա թողնելու մեջ։
Քեմալ Քըլըչդարօղլուն հայտարարում է, որ իր հաղթանակի դեպքում Թուրքիայում կավարտվի միանձնյա իշխանությունը, եւ երկիրը գերնախագահական հանրապետության փոխարեն կվերածվի խորհրդարանական հանրապետության։
Ընտրությունների առաջին փուլում Ռեջեփ Թայիփ Էրդողանը մոտ 2,5 միլիոն ձայն ավել էր հավաքել Քեմալ Քըլըչդարօղլուից։
