Վրաստանում գազաֆիկացումը առաջնահերթություններից մեկն է, սակայն դա պետք է կատարվի անվտանգության կանոններին լիովին համապատասխան, հայտարարել է Էկոնոմիկայի եւ կայուն զարգացման փոխնախարար Նաթիա Թուրնավան:
Գազի կենցաղային տեխնիկայի եւ գազի արտահոսքի թեման դարձել է ամենաշատ քննարկվողն այն բանից հետո, երբ անցած շաբաթ ՝ Թբիլիսիի արվարձանում գտնվող Դիդի Դիղոմի թաղամասում նորակառույց շենքի վեցերորդ հարկում` ուժեղ պայթյուն եղավ: Նախնական տվյալներով, պայթյունի պատճառը գազի արտահոսքն ու կուտակումն է հանդիսացել : Միջադեպի հետևանքով չորս մարդ է զոհվել, այդ թվում 4-ամյա երեխա: Նախօրեին, Թբիլիսիի ծայրամասում՝ Վարկեթիլիում, շմոլ գազի զոհ են դարձել նաև երկու տարեց տղամարդ:
«Խորապես ցավում եմ գազի պայթյունի եւ գազից թունավորման ողբերգական դեպքերից զոհվածների համար, եւ հուսով եմ, որ ՆԳՆ-ի կողմից կատարվող քննությունը կպարզի ողբերգության պատճառները: Միեւնույն ժամանակ, մենք մտադիր ենք ուժեղացնել գազի օգտագործման անվտանգությունը եւ ներմուծել այդ ոլորտում լավագույն միջազգային փորձը», – Վրաստանի Հանրային հեռուստատեսությանը տված հարցազրույցում հայտարարել է Թուրնավան:
Նրա խոսքով, հետագայում նախատեսվում է էլ ավելի խստացնել՝ որակավորված ընկերությունների կողմից շինարարական եւ տեղադրման աշխատանքների անցկացման պահանջները:
Կխստացվեն նաեւ անհատական բնակտարածությունում՝ բնական գազի ցանցի տեղադրման պահանջները, ինչպես նաեւ բնական գազի տեխնիկայի անվտանգ օգտագործման ստուգումները:
Տարվում է ակտիվ աշխատանք կապված առկա կարգավորող բազայի վերանայման հետ, որը կփոխվի գործընթացի մեջ ներգրավված բոլոր կողմերի իրավունքների եւ լիազորությունների իրացման եւ խստացման ուղղությամբ, – նշել է Թուրնավան:
Բացի այդ, հանրությունը կշարունակի ակտիվորեն իրազեկվել բնական գազի անվտանգ օգտագործման վերաբերյալ, – ընդգծել է փոխնախարարը:
Պաշտոնական տվյալների համաձայն, 2016-2018 թթ. Վրաստանի մայրաքաղաքում բնական գազի արտահոսքի զոհ է դարձել 86 մարդ, իսկ 285-ը՝ թունավորվել են: Միայն 2018 թվականին գազի արտահոսքից մահացել է 27 մարդ, 98-ը՝ թունավորվել:
Նյութը՝ «Նորություններ Վրաստան»-ից
