Հուլիսի 12-ին կայացավ «Ջավախքի ձայնը» երգի մրցույթ-փառատոնի առաջին փուլը, որին մասնակցել են շուրջ 150 կատարողներ՝ Ախալքալաքի, Նինոծմինդայի, Ախալցիխեի, Ասպինձայի և Ծալկայի շրջաններից։ 150 մասնակցից նախագծի հաջորդ փուլ է անցել առավելագույն միավորներ հավաքած 40-ը։
Նախագծի երկրորդ փուլը տեղի կունենա հուլիսի 27-ին՝ ժամը 15։30-ին, Ախալքալաքի մշակույթի տանը, որին կարող են ներկա գտնվել բոլոր ցանկացողները։
Նախագծի ժյուրիի անդմաներն են՝ Երևանի Կոմիտասի անվան պետական կոնսերվատորիայի պրոֆեսոր, օպերային երգիչ Ալեքսանդր Թամազովը, դաշնակահար, կոմպոզիտոր, Երևանի Կոմիտասի անվան պետական կոնսերվատորիայի դոցենտ Կարեն Անանյանը, դասական երգչուհի, Սայաթ-Նովա երաժշտական դպրոցի դասախոս Շուշանիկ Հովհաննիսյանը, ջավախքցի սիրված երգիչ Արմեն Մկոյանը և ՋԱՀ-ի հոգաբարձուների խորհրդի անդամ, ՀՀ վաստակավոր ճարտարապետ Հովհաննես Մութաֆյանը։
Երկրորդ փուլի լսումներից հետո տեղի կունենա գալա-համերգ, որն այս տարի կանկցկացվի Երևանում։ Նշենք, որ նախագծի հաղթող մասնակիցները կստանան մրցանակներ և դրամական պարգև։
Ծրագիրն իրականացնում է «Ջավախքին աջակցություն» հիմնադրամը՝ ՀՀ ԿԳՄՍ նախարարության և Մավր Մկրտչյանի հետ համատեղ, որին աջակցում են Վրաստանում ՀՀ դեսպանությունը, ինչպես նաև Ախալքալաքի և Նինոծմինդայի քաղաքապետարանները։
