Այսօր՝ փետրվարի 13-ին, մայրաքաղաք Թբիլիսիում գործող Հայ Առաքելական եկեղեցիներում ևս նշեցին Տեառնընդառաջի տոնը։ Սուրբ Գևորգ առաջնորդանիստ եկեղեցում Վիրահայոց թեմի առաջնորդ, Գերաշնորհ Տեր Կիրակոս Եպիսկոպոսի հանդիսապետությամբ տեղի ունեցավ նորապսակների օրհնության կարգ:
Նախ եկեղեցու բակում վառվեց Տեառնընդառաջի կրակը, ներկաները շուրջպար բռնեցին, պարեցին հայկական երաժշտության ներքո, իսկ կրակի թուլանալուն պես զույգերը սկսեցին ցատկել կրակի վրայով: Եկեղեցու բակում կազմակերպվել էր նաև քաղցրավենիքի հյուրասիրություն, որին հետևեց տոնական հրավառություն:
Հայկական ավանդական այս տոնը հետաքրքրել էր նաև օտարերկրացիներին, Տեառնընդառաջին մասնակցում էին տարբեր ազգի ներկայացուցիչներ, նրանք ներկաներից տեղեկանալով տոնի խորհուրդի մասին իրենք ևս ցատկում էին խարույկի վրայով։
Առաքելական Սուրբ Եկեղեցին Տեառնընդառաջը կամ 40-օրական Հիսուսի ընծայումը տաճարին տոնում է Աստվածահայտնությունից 40 օր հետո` փետրվարի 14-ին: Հայ Եկեղեցու կանոնի համաձայն՝ տոնի նախօրեին, երեկոյան ժամերգությունից հետո կատարվում է նախատոնակ: Այն ավետում է Տերունի տոնի սկիզբը: Նախատոնակի արարողության ավարտին կատարվում է Անդաստանի արարողություն, որի ընթացքում օրհնվում են աշխարհի չորս ծագերը: Եկեղեցու կանթեղներից վերցված կրակով վառվում են խարույկներ՝ իբրև Քրիստոսի լույսի խորհրդանիշ:
Տերունի այս տոնը հիշատակում է 40-օրական Հիսուսի ընծայումը Տաճարին:
Ըստ հրեական օրենքի` ամեն մի արու զավակի ծնունդից հետո, երբ լրանում էին սրբագործման 40 օրերը, նորածնի մայրն իր երեխայի հետ այցելում էր Տաճար, զոհ մատուցում եւ իր զավակի համար օրհնություն ստանում քահանայից: Այսպես և ս. Աստվածամայրը 40-օրական Հիսուսի հետ ներկայանում է Տաճար:
