Նինոծմինդայի մունիցիպալիտետի Սամեբա գյուղում տեղադրվում է երկրաշարժերի գրանցման սեյսմիկ սարքավորումների համակարգ։ Ծրագիրն իրականացվել է «Awesome Foundation Javakhk»-ի ֆինանսական աջակցությամբ, նախագծի հեղինակը ռոբոտաշինության և իրերի ներցանցի [IoT] ոլորտի մասնագետ Նապոլեոն Մարիկյանն է։ Այս մասին հայտնում է NOR ռադիոկայանը :
Ի սկզբանե, տարածաշրջանի գրեթե բոլոր երկրաշարժերի էպիկենտրոնում սեյսմիկ սենսորների և գեոֆոնի տեղադրման գաղափարը Վրաստանի ակադեմիական շրջանակներում առաջ քաշվեց Կոնստանտին Ստալինսկու կողմից, ով օգնեց իրականացնել այս նախագիծը: Նախագծի հեղինակը նշում է, որ իրեն օգնել է նաև Գիորգի Գոթոշիան։
Երկրաշարժերի գրանցման համար տեղակայման վայր է ընտրվել Սամեբա գյուղը, որտեղ գրանցված է զգալի սեյսմիկ ակտիվություն։ Սեյսմոմետրը և գեոֆոնը տեղադրված են Սամեբա գյուղից 3 կմ հեռավորության վրա։
Նապոլեոն Մարիկյանի խոսքով, այս նախաձեռնության նպատակն է երկրաշարժից մի քանի րոպե առաջ ստանալ տվյալներ սեյսմիկ ակտիվության մասին, երբ երկրագնդի թիթեղներում տեղաշարժեր են տեղի ունենում և ձայնային ալիքներ են ձևավորվում։
Այս տվյալները նախ կպահվեն սերվերի վրա և հասանելի կլինեն հանրությանը: Հետագայում, եթե նախագիծը հաջողվի, տեղեկատվությունը հասանելի կլինի NOR ռադիոկայանի կայքում, իսկ բնակիչները կկարողանան առցանց վերահսկել սեյսմիկ ակտիվությունը:
Բացի այդ, Վրաստանի երկրաֆիզիկայի ինստիտուտի ներկայացուցիչներն արդեն համագործակցության հետաքրքրություն են հայտնել և ծրագրում են սեփական սեյսմիկ սենսորները տեղադրել Նինոծմինդայի մունիցիպալիտետում։
Այս պահին արդեն տեղադրվել է երեք սենսոր՝ մեկը հայտնաբերում է երկրագնդի թիթեղների հորիզոնական շարժումը, երկրորդը՝ ուղղահայաց, երրորդը՝ թրթռումները։ Այս սենսորները գործում են ռադիոմոդուլների սկզբունքով և տվյալները փոխանցում են ինտերնետի միջոցով:
Երկրաշարժերը ստորգետնյա գործընթացների արդյունք են, որոնք առաջացնում են երկրի մակերեսի տատանումներ։ Այս երևույթները կապված են Երկրի ընդերքում տեղաշարժերի հետ, և դրանք առաջացնում են սեյսմիկ ալիքներ, որոնք տարածվում են Երկրի ընդերքում և թիկնոցում։
Սամեբա գյուղի մոտ գտնվող բլրի վրա մշտադիտարկման համակարգի տեղադրման աշխատանքները ավարտական փուլում են։
