Այսօր՝ ապրիլի 24-ին, Ախալքալաքի Սուրբ Խաչ եկեղեցու բակում տեղի ունեցավ հիշատակի կարգ 1915 թվականին Օսմանյան կայսրությունում Հայոց ցեղասպանության 108-րդ տարելիցի առթիվ: Ախալքալաքի բնակիչները ծաղիկներ խոնարհեցին ցեղասպանության զոհերի հիշատակը հավերժացնող հուշարձանին և մոմ վառեցին սուրբ նահատակների հոգիների հանգստության համար։
Կարգը կատարեցին Ախալքալաքի Սուրբ Խաչ եկեղեցու քահանա Տեր Նարեկ Տիգրանյանը և Սամցխե-Ջավախքի և Ծալկայի ընդհանուր առաջնորդական փոխանորդ Տեր Նշան վրդ. Հմայակյանը: Քաղաքապետարանի, սակրեբուլոյի, բոլոր մունիցիպալ հիմնարկների աշխատակիցները, դատարանի, բանկերի աշխատակիցները, գործարարները, Ախալքալաքի վրացական եկեղեցու ներկայացուցիչները և շարքային քաղաքացիները ծաղիկներ խոնարհեցին ցեղասպանության զոհերի հիշատակն անմահացնող խաչքարին։ Նաև ժամը 12:00-ին Ախալքալաքի բոլոր դպրոցների աշակերտներն ու անձնակազմը, ինչպես նաև Ախալքալաքի սպասարկման կենտրոնի աշխատակիցները ծաղիկներ դրեցին հուշահամալիրի առջև:
Պատարագից հետո բոլոր նրանք, ովքեր եկել էին հարգելու անմեղ զոհերի հիշատակը, մոմ վառեցին Սուրբ Խաչ եկեղեցում։
Ավելի քան մեկուկես միլիոն հայերի բնաջնջումից հետո Օսմանյան կայսրությունում մի քանի սերունդ է ծնվել ու մեծացել։ Ներկայիս սերունդը չի տեսել Ցեղասպանության տառապանքը, նրանց պապերն ու տատերը, ովքեր պատմել են այդ պատմությունները, նույնպես վկա չեն եղել, սակայն լսել են իրենց նախնիներից։ Այնուամենայնիվ, կոտորածի մասին հիշողությունները մնում են, քանի որ Հայոց ցեղասպանությունն արմատապես փոխեց հայերի կյանքը և մնաց նրանց գենետիկ հիշողության մեջ:
Ցեղասպանության ժամանակ «ցրված» հայերը հաստատվել ու ապրում են աշխարհով մեկ։ Ցեղասպանության թեման այն խնդիրներից է, որը ընդհանուր ելակետ է համայն հայության համար։ Իսկ Հայոց ցեղասպանության ճանաչումը այն երկրի կողմից, որի քաղաքացին և բնակիչն է հայը, միշտ մնում է նրա համար կարևոր հարց։
