Եվրամիության խորհրդի նախագահ Շառլ Միշելն այսօր առավոտյան հեռախոսազրույցներ է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ:
«Քննարկեցինք իրավիճակը տեղում: Ընդգծեցի Եվրամիության պատրաստակամությունը՝ օգնելու իրենց երկրների միջև կարգավորման գործընթացին, նպաստելու տարածաշրջանում երկխոսությանն ու խաղաղությանը», – թվիթերում գրել է Շառլ Միշելը:
Հայաստանի վարչապետի աշխատակազմի լրատվականի հաղորդագրության համաձայն՝ Փաշինյանը և Միշելը հեռախոսազրույցի ժամանակ անդրադարձել են Ադրբեջանի կողմից Լաչինի միջանցքի ապօրինի արգելափակման հետևանքով շարունակվող ճգնաժամային իրավիճակին:
Վարչապետի աշխատակազմի լրատվական վարչության փոխանցմամբ՝ մտքեր են փոխանակվել Հայաստան-Ադրբեջան հարաբերությունների կարգավորման գործընթացի, խաղաղության պայմանագրի, տարածաշրջանի հաղորդուղիների վերագործարկման հարցերի շուրջ։
Փաշինյանը մտահոգություն է հայտնել վերջին շրջանում Ադրբեջանի աճող ագրեսիվ հռետորաբանության և սադրիչ գործելակերպի առնչությամբ, ինչը խոչընդոտում է կայունությանն ու խաղաղությանը միտված ջանքերին։
Ադրբեջանական կողմի հաղորդագրության համաձայն՝ Ալիևը Միշելի հետ հեռախոսազրույցում պնդել է, թե Հայաստանը շարունակում է զենք և անձնակազմ տեղափոխել Ղարաբաղ։
Նա հայտարարել է, թե Լաչինի միջանցքով անցած տարվա դեկտեմբերի 12-ից մինչ օրս անցել է ռուս խաղաղապահներին և Կարմիր Խաչի միջազգային կոմիտեին պատկանող մոտ 5 հազար մեքենա։
«Երկրի ղեկավարը նշել է, որ 2023 թվականի մարտի 20-ին հայ-ադրբեջանական պետական սահմանի ուղղությամբ, որտեղ գտնվում է Եվրամիության առաքելությունը, Հայաստանի հերթական սադրանքի հետևանքով վիրավորվել է Պետական սահմանային ծառայության զինծառայող, իսկ մարտի 5-ին Ադրբեջանի Ղարաբաղի շրջանում հայկական անօրինական զինված կազմավորումների սադրանքի արդյունքում զոհվել է երկու զինծառայող», – ասված է Ադրբեջանի նախագահի աշխատակազմի հաղորդագրությունում:
