Ըստ ֆինանսների նախարար Լաշա Խուցիշվիլիի, ուսուցիչների դեկրետային արձակուրդն այլ կարգով վճարելու որոշումն արդեն կայացվել է և ներառված է 2023 թվականի բյուջեում, նրանք վարձատրվելու են 6 ամիս, իրենց ստացած աշխատավարձի չափով։
«Կրթության եւ գիտության ֆինանսավորումն ավելանում է 370 մլն լարիով եւ կազմում է 2 մլրդ 550 մլն լարի։ Նախադպրոցական կրթության ֆինանսավորումը կազմում է 490 մլն լարի, իսկ մանկապարտեզի աշխատողների աշխատավարձերի 100 լարիով բարձրացում է նախատեսվում։ Հանրակրթության ֆինանսավորումը 1 մլրդ 655 մլն լարի է, որի շրջանակներում կիրականացվի կարգավիճակ ունեցող և հատուկ ուսուցիչների նպաստի 125 լարիով ավելացում։ Դպրոցների ադմինիստրատիվ և տեխնիկական անձնակազմի աշխատավարձերի 10%-ով բարձրացում, դպրոցի անձնակազմի 125 լարիով, դպրոցի հոգեբանների և սոցիալական աշխատողների՝ 10%-ով, իսկ դպրոցի ուսուցիչների 6 ամսվա ծննդաբերության արձակուրդի ֆինանսավորում։ Ինչպես գիտեք, մինչ այժմ նրանք ընդամենը 1000 լարի ստանալու հնարավորություն ունեին, և այս որոշումը կայացվել է առողջապահության և կրթության կոմիտեների հետ խորհրդակցելուց հետո»,- ասել է Վրաստանի ֆինանսների նախարար Լաշա Խուցիշվիլին։
Հիշեցնենք, որ խորհրդարանի նախագահ Շալվա Պապուաշվիլին Առողջապահության հանձնաժողովին հանձնարարել էր դեռ հունվարին քննարկել մանկավարժների ծննդաբերության արձակուրդի վճարման հարցը՝ հիմնվելով դպրոցի ուսուցչուհի Թամար Ցանավայի նամակի վրա։
Լաշա Խուցիշվիլին ևս մեկ անգամ խոսեց այն միջոցների մասին, որոնք պետք է ուղղվեն ենթակառուցվածքային, մասնագիտական և բարձրագույն կրթությանը և նշեց, որ նախատեսվում է 500 դպրոցի կառուցում և վերականգնում, որի համար նախատեսված է 300 մլն լարի։ Մասնագիտական կրթության ֆինանսավորումը կազմում է 155 մլն լարի, որտեղ նախատեսվում է ուսուցիչների ժամավճարի բարձրացում 15-ից 18 լարիի։ Ավելի քան 55 մլն լարի ուղղվելու է ենթակառուցվածքների զարգացմանը, իսկ ավելի քան 250 մլն լարի՝ բարձրագույն կրթության եւ գիտության ֆինանսավորմանը։
