Ախալքալաքի շրջանի Դիլիսկա գյուղում այսօր օգնություն է բաժանվել թվով 25 ընտանիքի, նպատակն էր Ամանորի շեմին որոշ չափով թեթևացնել նրանց հոգսը:
Ծնունդով Դիլսկայից, ռուսաստանաբնակ բարերարներ Վանիկ և Ռոբերտ Մոսոյանների ֆինանսական աջակցությամբ, գյուղապետարանի միջնորդությամբ և գյուղացիների օգնությամբ օգնություն բաժանվեց մարդկանց, որոնք ապրում են ֆինանսական ծանր պայմաններում: Օգնությունը իր մեջ ներառում էր մեկ պարկ ալյուր, մեկ պարկ շաքարավազ և 50 լարի:
Գյուղապետ Հովհաննես Գաբրիելյանի տրամադրած տեղեկության համաձայն, գյուղում կա 550 ընտանիք, բայց օգնություն ստացողների քանակը սահմանափակ էր և այդ ընտանիքների ցանկը կազմվել է ֆինանսական կարգավիճակից ելնելով և, բացի դրանից, ընտրվել են նաև միայնակ ապրող մարդիկ:
Օգնություն ստացողներից մեկն էր Վարդենիկ Գաբրիելյանը, ով ապրում է իր վատառողջ քրոջ հետ միասին:
“Շնորհակալություն եմ հայտնում բոլորին, ովքեր իրենց մասնակցությունն են ունեցել այս օգնությունը տրամադրելու գործում, իսկ առանձնակի շնորհակալ եմ Ռոբերտ Մոսոյանին իր կատարած բարեգործության համար: Ես ուսուցչուհի եմ, սակայն ստացածս աշխատավարձը հազիվ է բավականացնում ամենօրյա ծախսերի համար, իսկ այս օգնությունը մեծ նշանակություն ուներ ինձ համար”։
Երախտիքի խոսքեր հնչեցնում էին բոլոր ստացողները։
Ինչպես նշեց տարածքային պատգամավոր Գագիկ Գաբրիելյանը, Մոսոյան եղբայրները բնակվում են Ռուսաստանի Դաշնությունում և այս հումանիտար օգնությունը առաջինը չէր նրանց կողմից։ Նրանց բարեգործությունը կրում է մշտական և շարունակական բնույթ:
