Փոթի քաղաքում (Սամեգրելոյի շրջան) կորոնավիրուսից մահացել է բուժքույր, որն աշխատում էր տեղի Արտակարգ իրավիճակների համակարգման կենտրոնում: Այս մասին հայտնում է «Իմեդի» հեռուստաընկերությունը:

Ըստ կենտրոնի՝ 48-ամյա բուժքույրը ութ ամսվա ընթացքում կորոնավիրուսով վարակվել է երկու անգամ: Վերավարակումից հետո հիվանդի վիճակը հանկարծակի այնքան է ծանրացել, որ բժիշկներին չի հաջողվել փրկել նրա կյանքը:

Վերջին տաս օրվա ընթացքում բուժքույրը բուժումը ստացել է Թբիլիսիի Առաջին համալսարանական կլինիկայում:

Ընդհանուր առմամբ, Վրաստանում արձանագրվել է կորոնավիրուսով վերավարակման երեք դեպք, որից մեկ հիվանդ վարակվել է ապաքինվելուց 2.5 ամիս անց:

Այս մասին ավելի վաղ հայտարարել էր Հիվանդությունների վերահսկման և հանրային առողջության ազգային կենտրոնի փոխտնօրեն Պաատա Իմնաձեն:

Երեկ Սամեգրելո-Զեմո Սվանեթիի շրջանում հայտնաբերվել է կորոնավիրուսի 149 նոր դեպք: Ապաքինվել է 117 մարդ: 273 վարակվածներ բուժում են ստանում շրջանում գործող կլինիկաներում: 8 մարդ գտնվում է կարանտինում:

Ըստ համաճարակաբանների տվյալների, Վրաստանը մուտք է գործել կորոնավիրուսի տարածման երրորդ ալիքի պիկային շրջան:

Անցած մեկ օրվա ընթացքում երկրում գրանցվել է կորոնավիրուսային վարակի 1409 նոր դեպք, բուժվել է 1 256 մարդ, մահացել՝ 27-ը: