Սկսվել է մեղվաբուծական կոոպերատիվի գրանցումները «մեղվաբուծական կոոպերատիվների զարգացման համար» ծրագրի շրջանակներում, ըստ որի կոոպերատիվներին տալիս են փեթակներ 30% ինքնաֆինանսավորմամբ:
Կոոպերատիվների գրանցման ծրագրի երկրորդ փուլը սկսվել է փետրվարի 29-ին և շարունակվելու է մինչ մարտի 16-ը: Ծրագրի առաջին փուլում երեք կոոպերատիվներ Ախալքալաքի շրջանից` «Նեկտար 2015», «Փարավանի» և «Ագրոգրուպ Թոթխամ» ստացան փեթակներ:
Կոոպերատիվ «Նեկտար 2015»-ը ստացավ 100 փեթակ «Ռուտի», «Փարավանի»-ն` 35 փեթակ «Ռուտի» և 10 փեթակ «Դադանի», Կոոպերատիվ «Ագրոգրուպ Թոթխամ»-ն` 46 փեթակ «Ռուտի»: «Ռուտի» և «Դադանի» փեթակները արժեն 120 լարի, իսկ պենոպոլիստեռոլից փեթակները` 260 լարի:
Ըստ Վրաստանի գյուղատնտեսության նախարարության Ախալքալաքի տեղեկտվական-խորհրդատվական կենտրոնի ղեկավար` Ռամազ Գոգոլաձեի, առաջին փուլի համար գրանցվել են 7 կոոպերատիվներ, սակայն օգնություն են ստացել միայն երեքը:
«Մնացածները փաստաթղթերի հետ կապված խնդիրներ ունեին, սխալ էին լրացված փաստաթղթերը»,- ասում է Ռամազ Գոգոլաձեն:
Հիշեցնենք, որ պետական ծրագրի առաջին փուլը սկսվել է 2015 թվականի սեպտեմբերի մեկից:
Ծրագիրը վերաբերում է միայն կոոպերատիվներին, որոնք ունեն առնվազն 30 փեթակ: Կարող են մասնակցել ոչ միայն մեղվաբուծությամբ զբաղվող կոոպերատիվները, այլ նաև մյուսները, որոնք կանոնադրությամբ իրավունք ունեն զբաղվելու մեղվաբուծությամբ: Արժեքի 70%-ը վճարվում է պետության կողմից, իսկ 30%-ը կոոպերատիվի: Ըստ ծրագրի նախատեսվում է կրկնապատկել կոոպերատիվների փեթակների քանակը, այն կստանա այնքան, ինչքան ունի, բայց 100-ից ոչ ավելի:
Շուշան Շիրինյան
