Այսօր՝ հուլիսի 20-ին, նախկին թիվ 1 զինվորական ավանի ավելի քան 70 բնակիչներ բողոքի ցույց էին կազմակերպել՝ պահանջելով, որ զինվորականները չփակեն իրենց կենտրոնական ճանապարհը: Վրաստանի պաշտպանության նախարարությունը մտադիր է զորամասը քաղաքի բնակելի մասից ցանկապատել փշալարերով՝ դրանով իսկ փակելով կենտրոնական ճանապարհը:
Նախկին թիվ 1 զինվորական ավանի բնակիչները բողոքի ցույց էին կազմակերպել` պահանջելով Պաշտպանության նախարարության և տեղական ինքնակառավարման մարմինների ներկայացուցիչներին չփակել այն կենտրոնական ճանապարհը, որից նրանք օգտվում են ամեն օր:
Բողոքի ցույցի ժամանակ ներկա էին նաև Ախալքալաքի մունիցիպալիտետի քաղաքապետարանի աշխատակազմի և Սակրեբուլոյի ներկայացուցիչները:
Բնակիչներից մեկը, որի տունն ամբողջովին գտնվում է զորամասում, բողոքում էր և պնդում, որ թույլ չի տա ճանապարհը փակել:
Տեղական կառավարման և Պաշտպանության նախարարության ներկայացուցիչները այլընտրանքային ճանապարհ առաջարկեցին, սակայն բնակիչները չհամաձայնեցին դրան, քանի որ այդ ճանապարհը շատ երկար և անհարմար է ձմեռային շրջանում մեքենա վարելու համար:
«Մենք թույլ չենք տա փակել մեր ճանապարհը, մեզ այլընտրանքային ճանապարհ հարկավոր չէ», – ասում է զինվորական ավանի բնակիչը:
Ցույցի ավարտից հետո, որը տևեց ավելի քան մեկ ժամ, բնակիչները և քաղաքապետարանի ներկայացուցիչները պայմանավորվեցին հանդիպել վաղը` հուլիսի 21-ին, և մանրամասն քննարկել ամեն ինչ:
Քաղաքապետի տեղակալ Արմեն Մառանգոզյանի խոսքով՝ վաղը բնակիչների հետ հանդիպելու համար Թբիլիսիից պետք է բարձրաստիճան պաշտոնյա ժամանի:
«Մենք կանենք ամեն ինչ, որպեսզի օգնենք բնակիչներին, բայց ամեն ինչ կախված է վաղվա հանդիպումից», – ասում է նա:
Հիշեցնենք, որ ցանկապատը նախատեսվում է տեղադրել անմիջապես թիվ 475 տան պատուհանների տակ: Նախագիծը, որի համաձայն նրանք նախատեսում են տեղադրել ցանկապատը, կվերաբերի այս մասի բոլոր շենքերին: Այնուամենայնիվ, եթե փշալարերը այլ շենքերից անցնեն մի քանի մետր (6-7) հեռու այլ տներից, ապա թիվ 475 տան դեպքում այն կանցնի անմիջապես պատուհանների տակից:
Եթե ցանկապատը տեղադրվի նախագծի համաձայն, ապա զորամասում կմնա խաղահրապարակը, որը քաղաքապետարանը կառուցել է մի քանի տարի առաջ, ինչպես նաև ևս մեկ տուն, որտեղ չորս ընտանիք է ապրում: Ճիշտ է, այս շենքը չի փոխանցվել մունիցիպալիտետի հաշվեկշռին, բայց մարդիկ այնտեղ ապրում են:
JNEWS-ը հետևում է իրադարձությունների զարգացմանը:
Բրատիսլավ Իգիթխանյան