Այսօր, փետրվարի 8-ին, ժամը 14:00-ից Թբիլիսիում Վրաստանի խորհրդարանի շենքի դիմաց մի խումբ ազգությամբ ադրբեջանցիներ բողոքի ցույց են անցկացնում: Նրանք պահանջում են ապամոնտաժել հունվարի 20-ին Ախալքալաքի շրջանի Բուղաշեն գյուղում վերաբացված Միքայել Ավագյանի կիսանդրին:
Ակցիայի մասնակիցները Ավագյանին անջատողական են անվանում՝ հայտարարելով իբրև վերջինս մասնակցել է ոչ միայն Ղարաբաղի, այլև Աբխազիայի պատերազմին: Նրանց խոսքով, կիսանդրու գոյությունը բացասաբար է ազդում վրաց-ադրբեջանական բարեկամության վրա:
Բուղաշենում տեղադրվեց ազատամարտիկի հուշարձանը
Բուղաշենցիների հպարտությունը միջէթնիկ երկպառակության առաջացման հիմք է դարձել
Բուղաշենի հուշարձանը քննարկման թեմա է դարձել խորհրդարանում
Օրեր առաջ, կիսանդրու հարցը ընդդիմադիր «Միացյալ ազգային շարժման» անդամ Ազեր Սուլեյմանովը բարձրացրել էր նաև Վրաստանի խորհրդարանում: Նրա խոսքով՝ Ախալքալաքի Բուղաշեն գյուղում կատարվածը նպատակաուղղված սադրանք էր Վրաստանի դեմ:
Հիշեցնենք, հունվարի 20-ին Ախալքալաքի Բուղաշեն գյուղում վերաբացվել է արցախյան պատերազմի ազատամարտիկ Միքայել Ավագյանի կիսանդրին: Ինչից հետո ադրբեջանական և վրացական մամուլում, ինպես նաև սոցցանցերում սկսեցին տարածվել հակասական տեղեկություններ Ավագյանի ինքնության մասին, իբրև վերջինս մասնակցել է Աբխազիայի պատերազմին ևս, եղել է Բաղրամյանի գումարտակի անդամ, ինչը չի համապատասխանում իրականությանը:
