Ախալքալաքի Շրջանային Ժողովի 5 հանձնաժողովները ձևավորված են, նախագահներն ընտրված:
Նոյեմբերի 24-ին, Ախալքալաքի Շրջանային Ժողովի պատգամավորները փակ և գաղտնի քվեարկությամբ ընտրեցին հանձնաժողովների նախագահներին: Սակրեբուլոյում «Վրացական երազանք-դեմոկրատան Վրաստան» խմբակցության նախագահ Գայոս Լոմսաձեն ներկայացրեց իրենց կուսակցության կողմից առաջադրված թեկնածուներին, որոնք հանձնաժողովների նախագահներ ընտրվեցին պատգամավորների ձայների մեծամասնությամբ:
«Հայրենասերների դաշինք» խմբակցությունը ոչ միայն չառաջադրեց որևէ մեկի թեկնածությունը, այլև ձեռնպահ մնաց քվեարկության ժամանակ:
Ախալքալաքի նորընտիր Շրջանայի Ժողովի երկրորդ նիստին ներկա էին 38 պատգամավորներից՝ 34-ը: Բացակա էին «Վրացական երազանք» կուսակցության պատգամավորներ՝ Էդիկ Բերիկյանը, Հակոբ Չախմախչյանը, Օթար Երանոսյանը և «Հայրենասերների դաշինքից» Սարգիս Ուզունյանը:
Դահլիճում ներկա պատգամավորներից քվեարկությանը մասնակցեցին 30-ը: «Հայրենասերների դաշինքից» ընդդիմադիր պատգամավորներ՝ Զաքար Զաքարյանը, Սամվել Պետրոսյանը, Գենադի Էլիզբարյանը և Սիմոն Մանանյանը ձեռնպահ մնացին և չմասնակցեցին քվեարկությանը: 29 կողմ, 1 դեմ ձայներով թեկնածուները ընտրվեցին հանձնաժողովների նախագահներ:
– Ունեցվածքի կառավարման, բնապաշարների և ագրարային հարցերի հանձնաժողովի նախագահ ընտրվեց Անդրանիկ Մուրադյանը:
– Մանդատային, ընթացակարգային, իրավաբանական հարցերի և էթիկայի հանձնաժողովի նախագահ ընտրվեց Սիփան Շիպակցյանը:
– Ֆինանսաբյուջետային հանձնաժողովի նախագահ ընտրվեց Սեդա Մելքումյանը:
– Տարածքա-տերիտորիալ պլանավորման և ենթակառուցվածքների հանձնաժողովի նախագահ ընտրվեց Մելքոն Մակարյանը:
– Սոցիալական հարցերի, մշակույթի, կրթության, սպորտի և երիտասարդական հարցերի հանձնաժողովի նախագահ ընտրվեց Սարգիս Մելիքյանը:
Սակրեբուլոյի նիստի ավարտին «Դաշինքի» պատգամավոր Սամվել Պետրոսյանը խոսքի իրավունք խնդրեց: Նա հանդես եկավ առաջարկությամբ որպեսզի Ախալքալաքի Սակրեբուլոն նամակով դիմի Վրաստանի Կրթության և գիտության նախարարություն կապված Նախարարի վերջին հրամանի հետ: Ըստ որի 2018 թվականին Վրաստանում դիմորդները միասնական ընդունելության ընտրովի առարկաների քննությունները պետք է հանձնեն վրացերենով:
Ըստ Պետրոսյանի խոսքերի, դիմորդները իրավունք ունեն քննություն հանձնելու վրացերեն, օսերեն, աբխազերեն և ադրբեջաներեն լեզուներով, իսկ հայերենով ոչ:
jnews.ge-ն համապատասխան հարցերով դիմել է իրավասու մարմինների: «Վրաստան Օնլայն» կայքում այսօր առավոտյան տարածած ինֆորմացիան նախարարի հրամանի մասին անհասկանալի է: Համապատասխան թեման ճշտելուց հետո կներկայացնենք առաջիկայում:
Աղունիկ Այվազյան
