Հիմնովին վերանորոգվում է Ախալքալաքի մունիցիպալիտետի Ալաստան գյուղի հանրային դպրոցը, որը գտնվում էր անմխիթար վիճակում։ Ըստ նախագծի՝ նոյեմբեր ամսից նորոգված դպրոցը կընդունի աշակերտներին։
Կրթական և գիտական ենթակառուցվածքների զարգացման գործակալության ֆինանսական աջակցությամբ՝ արդեն մեկ տարի է շարունակվում է Ալաստան գյուղի հանրակրթական դպրոցի վերանորոգման աշխատանքները։
Ալաստանի հանրային դպրոցի տնօրենի խոսքով, դպրոցում այսպիսի վերանորոգում երբէ չի իրականացվել։
“1986 թվականից մինչև հիմա ընդհանուր կապիտալ վերանորոգում չի կատարվել։ Վարչապետի նախագծի շրջանակներում որոշվեց լրիվությամբ վերանորոգել։ Քանդված, ահավոր վիճակ էր։ Շնորհակալություն ենք հայտնում բոլորին, ովքեր մեր կողքին են։ Մինչև նոյեմբերի 25-ը կունենանք եվրոպական չափանիշներին համապատասխան դպրոց, լաբորատորիա, համակարգչային սիստեմ, ամեն ինչ”, – ասաց Ռուբեն Կրթյանը։
Դպրոցում նորոգում սկսելուց հետո դպրոցի սաները հաճախում են Վրաևան գյուղի հանրային դպրոց։ Ալաստանի հանրային դպրոց են հաճախում նաև հարևան՝ Կոկիո գյուղի երեխաները՝ 9-րդ դասարանից հետո։
Դպրոցում սովորում է 90 աշակերտ, այս տարի սեպտեմբերին առաջին դասարան կհաճախի 4 երեխա։ Ալաստանի դպրոցում 23 ուսուցիչ է դասավանդում, բոլորն էլ ավագ ուսուցչի կարգավիճակով։
“Ես հպարտությամբ կարող եմ նշել, որ մեր դպրոցի սաներից 80-90%-ը սովորում են տարբեր ԲՈՒՀ-երում՝ ինչպես Վրաստանում, այնպես էլ Հայաստանում”, – ասաց տնօրենը։
ՍՊԸ «Սաբա կոնստրաքշեն» ընկերության ներկայացուցիչ, դպրոցի վերանորոգման աշխատանքները համակարգող և շինարար Սամվել Մանանյանը գոհ է կատարվող աշխատանքներից։
“Աշխատանքների ընթացքում խնդիրներ չեն առաջացել, շինարարությունն իրականացնող ընկերությունը միշտ ամեն ինչ ժամանակին հասցնում է, այն ինչ հարկավոր է։ Աշխատողները բոլորը գյուղից են՝ 20 հոգի”, – ասաց Սամվել Մանանյանը։
Նշենք, որ Կրթության և գիտական ենթակառուցվածքների զարգացման գործակալության ֆինանսական աջակցությամբ է վերանորոգվում նաև Դադեշ և Կոթելիա գյուղերի հանրային դպրոցները։ Այդ դպրոցների վերանորոգման աշխատանքները նույնպես իրականացնում է ՍՊԸ «Սաբա կոնստրաքշեն»-ը։
