«Միջազգային թափանցիկություն – Վրաստան»-ը օգոստոսի 2-ին հրապարակել է քաղաքական նվիրատվությունների վերաբերյալ եռամսյակային տեղեկագիր, որն ընդգրկում է ապրիլի 1-ից հունիսի 30-ն ընկած ժամանակահատվածը։ Կազմակերպության տվյալներով՝ չնայած մոտալուտ խորհրդարանական ընտրություններին, 2024 թվականի երկրորդ եռամսյակը չի առանձնանում նվիրատվությունների առատությամբ։ Բոլոր կուսակցությունների կողմից ստացված ընդհանուր նվիրատվությունները կազմում են 2 միլիոնից պակաս։ «Վրացական երազանքը» ստացել է նվիրատվությունների կեսը՝ 1 մլն լարի, թեև այս ցուցանիշը ավելի քիչ է, քան կուսակցությունը ստացել էր ընտրական տարիներին։«Միջազգային թափանցիկություն – Վրաստան»-ը նշում է, որ «Վրացական երազանք»-ի դոնորները բազմամիլիոնանոց մրցույթներում հաղթած ընկերությունների բաժնետերերն են, սեփականաշնորհման արդյունքում բյուջետային սուբսիդիաներ ստացած ընկերությունների հետ փոխկապակցված, հանքարդյունաբերության ոլորտում լիցենզիաներ ստացած և պետական անշարժ գույք ձեռք բերած մարդիկ:
Հաշվետու ժամանակահատվածում 207 դոնոր բոլոր կուսակցություններին նվիրաբերել է ընդհանուր առմամբ 1 930 293 լարի, ինչը մոտավորապես 60%-ով ավելի է նախորդ եռամսյակի համեմատ։ «Վրացական երազանք»-ը ստացել է կուսակցությունների նվիրատվությունների 50%-ը՝ 961 176 լարի, երկրորդ տեղում «Լելո»-ն է՝ 464 990 լարիով, երրորդում՝ «Ազգային շարժում»-ը՝ 302 682 լարի։ Դոնորների քանակով առաջատարն է «Ազգային շարժումը», որին հաշվետու ժամանակահատվածում նվիրատվություն է կատարվել 73 անգամ (66 դոնոր) «Փոխիր Վրաստանը» կուսակցությունը ստացել է 55 նվիրատվություն (35 դոնոր):
«Միջազգային թափանցիկություն – Վրաստան»-ն ընդգծում է, որ «Փոխիր Վրաստանը» կուսակցությունը հիմնադրվել է 2020 թվականին, այն նվիրատվություն չի ստացել մինչև այս տարվա մայիսը, իսկ հաշվետու ժամանակահատվածում ստացել է մինչև 26 հազար լարի։
Հաշվետու ժամանակահատվածում «Վրացական երազանք»-ին 31 դոնոր ընդհանուր նվիրաբերել է 961 176 լարի։ 2024 թվականին 81 միլիոն լարիի տենդերները շահել են 31 դոնորների հետ կապված երկու ընկերություններ։ «Ժողովրդի ուժ»-ն առաջին անգամ քաղաքական նվիրատվություն է ստացել միայն երկու հոգուց՝ 96 հազար լարի, այդ թվում՝ խորհրդարանի անդամ Վիկտոր Ջափարիձեն (նա կուսակցությանը նվիրաբերել է 38 հազար լարի)։ Նույն ժամանակահատվածում Ջափարիձեի հետ փոխկապակցված ընկերությունը 138 հազար լարիի պարզեցված պայմանագրեր է կնքել։
Սերգո Խաբուլիանին 10 հազար լարի է նվիրաբերել «Վրացական երազանք»-ին, իսկ նրա «Ցեկուրի» ընկերությունը հաղթել է 14,8 միլիոն լարի արժողությամբ երկու մրցույթ: 2024 թվականի առաջին 6 ամիսներին Սերգո Խաբուլիանին «Վրացական երազանք»-ին նվիրաբերել է 50 հազար լարի, իսկ նրա «Ցեկուրի» ընկերությունը հաղթել է 79 միլիոն լարիի տենդեր։
Լևան Նեկրեսելշվիլին և Վաժա Ցիգրոշվիլին նույն օրը կուսակցությանը նվիրաբերել են 64000 լարի (ընդհանուր առմամբ նրանք 434 000 լարի են նվիրաբերել իշխող կուսակցությանը)։ Նրանց հետ փոխկապակցված ընկերությունները պետական տարբեր գյուղատնտեսական ծրագրերի շրջանակներում 2021-2022 թվականներին ստացել են 1 544 783 լարի։
Միխայիլ Բուզալաձեն 20 հազար լարի է նվիրաբերել «Վրացական երազանքին»։ Նա «Ռթվելիսի» գինեգործական ՍՊԸ-ի տնօրենն է, որը 2021-2023 թվականներին պետբյուջեից ավելի քան 1 մլն լարի է ստացել գյուղատնտեսական արտոնյալ վարկավորման և գյուղատնտեսական ապահովագրության շրջանակներում։ Բացի այդ, ընկերությունը 2022 և 2023 թվականներին խաղողի բերքի սուբսիդավորման ծրագրի շրջանակներում ստացել է 408 000 լարի։
Ապրիլի 22-ին Էլգուջա Մուչաուրին 20 000 լարի է նվիրաբերել «Վրացական երազանք»-ին։ 2024 թվականի փետրվարի 23-ին՝ նվիրատվությունից երկու ամիս առաջ, Մուչաուրիի հետ կապված մի ընկերությունը ստացել է Լիախվի ավազի և խճաքարի հանքավայրի արտադրության լիցենզիա 5 տարի ժամկետով 95 400 մ3 չափով։
Ապրիլի 4-ին Ադելաիդա Նանիկաշվիլին 60 հազար լարի է նվիրաբերել «Վրացական երազանք»-ին, իսկ ապրիլի 23-ին, կառավարության որոշմամբ, նրա ընկերությունը 5 անգամ ավելացրել է լիցենզավորված արդյունահանվող օգտակար հանածոների ծավալը։
