Ախալքալաքում շտապօգնության նոր շենքն արդեն կառուցվել է, ավարտվել են նաև արտաքին աշխատանքները, որոնք ձգձգվել էին ձմռան եղանակային խիստ պայմանների պատճառով։ Աշխատանքները կհանձնվեն մի քանի օրից։
Հիշեցնենք, որ Ախալքալաքում շտապօգնության նոր շենքի շինարարությունը սկսվել էր նախորդ տարվա օգոստոսի 3-ին։ Այն գտնվում է Ախալքալաքի ռեֆերալ հիվանդանոցի բակում՝ շտապօգնության հին շենքի դիմաց։
Նոր շենքի կառուցման մրցույթը հայտարարել է Վրաստանի օկուպացված տարածքներից փախստականների, աշխատանքի, առողջապահության և սոցիալական պաշտպանության նախարարությունը։ Նախնական գումարը կազմել է 459 451 լարի, մրցույթը շահել է Ախալքալաքից անհատ ձեռներեց Սերգեյ Չոլախյանը՝ 420 200 լարիի չափով։
Շինարարական աշխատանքներն ավարտվել էին վերջերս, շտապօգնության շենքի շինարարությունն ավարտվել էր դեռ փետրվարին, մնացել էին միայն հարդարման աշխատանքներն ու շենքի հարակից տարածքի ասֆալտապատումը։ Շտապօգնության նոր շենքն ունի 3 հանգստի սենյակ բժիշկների, բուժքույրերի և շտապօգնության վարորդների համար։ Կա նաև ընդարձակ խոհանոց-ճաշասենյակ, կա նաև տնօրենի աշխատասենյակ, որտեղ կա արխիվներ պահելու տարածք։ Շենքն ունի կաթսայատուն, որի մուտքը բակից է, և երկու սանհանգույց։
2019 թվականից Վրաստանում մեկնարկել է մինչև 300 պոլիկլինիկաների վերակառուցման, ավելի քան 100 նոր պոլիկլինիկաների և 40 շտապ օգնության կենտրոնների կառուցման նախագիծը։ Այդ ժամանակ Կառավարությունը 20 մլն լարի էր հատկացրել ծրագրի իրականացման համար, որն ընդգրկում էր տարբեր մունիցիպալիտետներ, այդ թվում՝ Ախալքալաքը։
Սկզբում Ախալքալաքում շտապօգնության շենք կառուցելու տեղ չէին կարողանում գտնել, ուստի նոր շենքի կառուցումը ձգձգվում էր։ 4 տարի պահանջվեց՝ տեղը որոշելու և այն շինարարությանը նախապատրաստելու համար։ Նշենք, որ նոր շտապ օգնության կենտրոնի շինարարությունը ֆինանսավորվում է Տարածաշրջանային զարգացման հիմնադրամի կողմից։
