Այսօր՝ ապրիլի 23-ին, Ախալքալաքի մունիցիպալիտետի բնակիչները ջահերով երթը սկսել են քաղաքի բերդից դեպի Սուրբ Խաչ եկեղեցի՝ պահանջելով ճանաչել և դատապարտել 1915 թվականին Օսմանյան կայսրությունում Հայոց Ցեղասպանությունը։
Նման երթի անցկացումը ավանդույթ է դարձել Ջավախքի երիտասարդական միության անդամների համար։ Երթը սկսվեց Ախալքալաքի բերդից, հարյուրավոր մարդիկ՝ Հայաստանի և Վրաստանի դրոշներով, 1915 թվականի Հայոց ցեղասպանության ճանաչման և դատապարտման պահանջով պաստառներով, ջահերով և կարգախոսներով քաղաքի կենտրոնական փողոցով երթով շարժվեցին դեպի Սուրբ Խաչ եկեղեցի։
Երթին մասնակցում էին Ախալքալաքի Սուրբ Խաչ եկեղեցու հոգևորական Տեր Նարեկ քահանա Տիգրանյանը, Վրաստանի խորհրդարանի պատգամավոր Սամվել Մանուկյանը, քաղաքապետ Մելքոն Մակարյանը և մունիցիպալ այլ աշխատակիցներ։
Եկեղեցու բակում ելույթ ունեցան Երիտասարդական միության անդամները, ինչպես նաև Տ. Նարեկ քհն. Տիգրանյանը։
«Սիրելի՛ հայրենակիցներ, այսօր Հայաստանում և աշխարհի շատ երկրներում բնակվող հայերը հայկական եկեղեցիներում կազմակերպում են ջահերով երթեր, ոգեկոչման միջոցառումներ, արարողություններ՝ հավերժացնելու Հայոց ցեղասպանության անմեղ զոհերի հիշատակը, որոնց հայերի հետ միասին մասնակցում են բազմաթիվ այլ ազգեր:
Մենք ողջունում ենք այն երկրներին, միջազգային հասարակական և քաղաքական կառույցներին, որոնք ճանաչել և դատապարտել են 1915 թվականին Օսմանյան կայսրության կողմից իրականացված Հայոց ցեղասպանությունը և միանում ենք մեր պայքարի ձայնին՝ հանուն արդարության, հանուն մարդասիրության, հանուն հետագա ցեղասպանությունների կանխարգելման և հուսալի ապագայի կառուցման»,- ասվում է Ջավախքի երիտասարդական միության անդամների կոչում։
Վաղը առավոտյան՝ ժամը 11:30-ին, Ախալքալաքի Սուրբ Խաչ եկեղեցում կմատուցվի Սուրբ Պատարագ։ Պատարագի ավարտին եկեղեցու բակում՝ Հայոց ցեղասպանության զոհերի հիշատակին կանգնեցված խաչքարի մոտ, կմատուցվի Սուրբ նահատակներին նվիրված Պատարագ։
