Փոքր և միջին բիզնեսի ներկայացուցիչներն ասում են, որ իրենց համար դժվար է ապրանքը տեղավորել խոշոր առևտրի ցանցերի վաճառասեղաններին, առաջին հերթին դա պայմանավորված է այնպիսի մեծ ծախսերով, որ իրենք գերադասում են իրենց արտադրանքը վաճառել ինտերնետի միջոցով։
Մատակարարման խնդիրները կապված են նաև այն բանի հետ, որ մանրածախ առևտրի խոշոր ցանցերը սկսել են սեփական արտադրությունը, ուստի փոքր և միջին բիզնեսին ընկալում են որպես մրցակից։
«Նրանք արտադրում են նմանատիպ ապրանքներ և խուսափում են մրցակիցների արտադրանքը տեղավորել իրենց օբյեկտներում։ Ուստի վրացի ձեռներեցների համար շատ դժվար է իրենց արտադրանքը վաճառել ցանցային սուպերմարկետներում։ Եվ դա, չնայած այն բանին, որ, որպես կանոն, դրանց վերաբերյալ որակական պահանջներ չկան։ Սակայն ցանցային ընկերությունները հրաժարվում են համագործակցել փոքր ընկերությունների հետ»,- ասում են փոքր ընկերությունների ներկայացուցիչները։
Կան նաև գործոններ, որոնք խանգարում են փոքր բիզնեսին, որոնք միշտ եղել են և ունեն ավանդական բնույթ, մասնավորապես, ապրանքները վաճառափեղկերին տեղադրելու համար հարկավոր է նախապես վճարել տարածքի համար, և սկսնակ բիզնեսը չի կարող դա թույլ տալ իրեն: Համապատասխանաբար, սկսնակ բիզնեսը պետք է կա՛մ բարձրացնի գները, որ ոչ ոք չի գնի իր արտադրանքը, կա՛մ հրաժարվի խոշոր մանրածախ ցանցեր ներթափանցելու փորձերից։
Մանրածախ ցանցերի ներկայացուցիչները հերքում են իրենց հասցեին հնչող այս մեղադրանքները։
«Մեր ցանցում նման սահմանափակումներ չկան։ Մինչ օրս մենք համագործակցում ենք բազմաթիվ միջին և փոքր ձեռներեցների հետ, և այս համագործակցությունը ներառում է բոլոր տեսակի ապրանքներ։ Մենք անհատական մոտեցում ունենք բոլորի նկատմամբ, ավելի մեծ ընկերությունների և մատակարարների դեպքում կարող ենք տարբեր պայմաններ ունենալ: Ինչ վերաբերում է փոքր ձեռներեցներին, ֆերմերներին, ստարտափներին, ապա մենք նրանց առանձնապես չենք սահմանափակում և միշտ բաց ենք համագործակցության համար, սակայն փոքր ընկերությունները առաքման և մատակարարման շարունակականության հետ կապված խնդիրներ ունեն»,- հայտարարել են «Նիկորա» ցանցից։
