---

Սփյուռքահայ պատանիների և երիտասարդների շրջանում ազգային ինքնության պահպանման և զարգացման նպատակով ՀՀ սփյուռքի գործերի գլխավոր հանձնակատարի գրասենյակը Հայաստանում իրականացնում է «Քայլ դեպի տուն» երկշաբաթյա ուսումնաճանաչողական ծրագիրը:

Ծրագիրը ներառում է՝

• 13-օրյա ճամբարային ծրագիր,
• հայոց լեզվի դասընթացներ (արևելահայերեն, արևմտահայերեն),
• հայրենագիտության դասընթացներ,
• ազգային երգ ու պարի դասընթացներ,
• ճանաչողական այցելություններ Հայաստանի պատմամշակութային վայրեր, թանգարաններ, կրթական հաստատություններ,
• հանդիպումներ պետական, հասարակական, մշակույթի և արվեստի գործիչների հետ,
• մարզական և մշակութային միջոցառումներ:

Ծրագրի 13-օրյա ժամանակահատվածի բոլոր ծախսերը հոգում է ՀՀ կառավարությունը:

Մասնակցել կարող են՝ 13-18 տարեկան ՀՀ քաղաքացի չհանդիսացող (բացառությամբ՝ երկքաղաքացիություն ունեցողների) սփյուռքահայ այն պատանիները և աղջիկները, որոնք՝

• նախորդ տարիներին չեն մասնակցել «Արի տուն» և «Քայլ դեպի տուն» ծրագրերին,
• իրենց հաշվին հոգալու են Հայաստան ժամանման և մեկնման տրանսպորտային ծախսերը,
• իրենց հաշվին ձեռք են բերելու երկշաբաթյա տուրիստական ապահովագրություն:

Այս տարվա ծրագիրը նախատեսված է 600 սփյուռքահայ պատանիների համար:

Ինչ վերաբերվում է հայտադիմումներին, ապա՝

«Քայլ դեպի տուն» 2024-ի հայտադիմումներն արդեն ընդունվում են, իսկ վերջնաժամկետն է ապրիլի 1-ը:

Դիմելու համար սեղմեք՝ այստեղ:

Նախքան ձեր հայտի լրացման գործընթացը սկսելը, խորհուրդ է տրվում ձեռքի տակ ունենալ հետևյալ ֆայլերը՝

• անձնագրի և լուսանկարի պատճեն,
• մոտիվացիոն տեսանյութ (1. Ինչու՞ եք ուզում մասնակցել ծրագրին: 2. Ի՞նչ ակնկալիքներ ունեք: 3. Ի՞նչ կուզեիք բացահայտել ծրագրի միջոցով),
• տեղեկանք ուսումնական հաստատությունից,
• տեղեկանք բնակության վայրից, եթե ՀՀ քաղաքացի եք,
• հաստատման նամակ ծնողի կողմից, այն ներբեռնելու համար սեղմեք՝ այստեղ:

Հաշվի առնելով տեղերի սահմանափակ քանակը մասնակիցների ընտրությունը կատարվելու է «Առաջինը դիմեցիր, առաջինը ընդունվեցիր» սկզբունքով:

Ծրագրի մասնակցության կամ մերժման ծանուցումը մասնակիցը կստանա հայտն ուղարկելուց 15 օր հետո:

Հիշեցնենք, որ ծրագիրը կիրականացվի 6 փուլով՝ հունիսի 3-ից օգոստոսի 24-ը՝

• հունիսի 3 – հունիսի 15,
• հունիսի 17 – հունիսի 29,
• հուլիսի 1 – հուլիսի 13,
• հուլիսի 15 – հուլիսի 27,
• հուլիսի 29 – օգոստոսի 10,
• օգոստոսի 12 – օգոստոսի 24։

Մասնակիցներին սպասվում է անմոռանալի օրեր, որոնց ընթացքում կսովորեն հայերեն, ազգային երգ ու պար, ինչպես նաև կճամփորդեն Հայաստանով մեկ: