Դեռ 2023 թվականի հունիս ամսին սկսված Կարծախ-Թուրքիա ճանապարհի վերականգնման աշխատանքները դեռ չեն ավարտվել։ Աշխատանքներն իրականացնում է «Արալի» ընկերությունը։
Հիմա սահմանից մինչև Կարծախ գյուղ տանող ճանապարհն ասֆալտապատ է, ընթանում է Կարծախից դեպի Բոզալի գյուղի ճանապարհի բարեկարգման աշխատանքները, իսկ գյուղամիջյան հատվածում դեռ աշխատանքներ չեն տարվում։
«Արալի» ընկերության ներկայացուցիչ Գոդերձի Բոլքվաձեն ասաց, որ գյուղամիջյան ճանապարհի վերականգնման համար շատ գործ կա անելու, միայն ասֆալտապատում չի լինելու։
«Մենք հիմա գյուղի սկզբնամասում ենք աշխատում, ինչ վերաբերվում է գյուղամիջյան ճանապարհին, ապա այնտեղ կառույցներ կան վերականգնելու, ճանապարհաեզրին խողովակներ պետք է տեղադրվեն, ծավալուն աշխատանք է տարվելու։ Նախ պետք է սկսենք և ավարտին հասցնենք վերոնշյալ աշխատանքները, այնուհետև անցնենք ասֆալտապատմանը, մինչ այդ կհարթեցնենք ճանապարհը, որպեսզի անցանելի լինի», – ասաց Գոդերձի Բոլքվաձեն։
Ճանապարհի գյուղամիջյան հատվածի աշխատանքներն այս տարի կսկսվեն թե՞ մյուս տարի, Բոլքվաձեն հստակ չկարողացավ նշել։
Արդեն քանդվել է Բոզալի գյուղի ճանապարհը։
Ինչպես ասաց Գոդերձի Բոլքվաձեն, երբ ավարտեն 1 կմ 500 մ ճանապարհահատվածի ասֆալտապատումը, այնուհետև կսկսեն Բոզալիի ճանապարհի վնասված հատվածի վերականգնման աշխատանքները։
Հիշեցնենք, որ Ախալքալաք-Կարծախ միջազգային նշանակության մայրուղին կառուցվել է 2010 թվականին, իսկ 2015 թվականին բացվել է «Կարծախի» անցակետը Թուրքիայի հետ սահմանին։
Այդ ժամանակից ի վեր այս ճանապարհով սկսել են երթևեկել հսկայական բեռնատարներ, տեղափոխելով մեծաքանակ բեռներ։
Բեռնատարների հոսքն անհամեմատ շատացավ անցած տարվանից, երբ սկսվեց ռուս-ուկրաինական պատերազմը։ Այս պահին Սուլդա գյուղի սկզբնամասից սկսվում է բեռնատարների շարասյունը մինչև Կարծախիի կայանատեղի: Չնայած այն հանգամանքին, ինչպես նշում են վարորդները երեկ ընդհանրապես ոչ մի բեռնատար կայանված չի եղել։
Այս թեմայով կարող եք նաև կարդալ՝
Սկսվել է Կարծախ-Թուրքիա ճանապարհի վերականգնման աշխատանքները
