Այսօր՝ ապրիլի 25-ին, Ախալքալաք են բերվել տնկիներ, որոնք կտնկվեն կենտրոնական հրապարակում գտնվող Մաշտոցի հուշարձանի շուրջ։ Jnews-ը հետաքրքրվեց, թե ի՞նչ ծառեր ու թփեր են տնկվելու Ախալքալաքի կենտրոնում։
«Թարմացված մունիցիպալիտետներ» ծրագրի շրջանակներում բարեկարգվում է քաղաքի կենտրոնը։ Դրա հետ կապված Մաշտոցի հուշարձանի շրջակայքը բարեկարգվելու է։ Այսօր այդ նպատակով քաղաք են բերվել ծառերի ու թփերի տնկիներ։
Այս բույսերը կտնկվեն Մաշտոցի հուշարձանի շրջակայքում, կփոխարինեն նաև քաղաքապետարանի դիմացի այգում տնկված չարմատավորված բույսերը։
Բույսերի նույնականացումն իրականացվել է տեղեկատվական տեխնոլոգիաների միջոցով, որոշ դեպքերում հնարավոր են անճշտություններ: Բերված բույսերի կոնկրետ ցանկ ձեռք բերել չհաջողվեց։
Ի՞նչ մենք գտանք Վիքիպեդիայում այս բույսերի մասին:
Իլենի՝ շատ տեսակներ վաղուց մշակվել են որպես դեկորատիվ բույսեր: Այս ցեղի բույսերը հարմար են դալար ցանկապատեր ստեղծելու համար: Այս ցեղի բույսերն աճում են լայնատերև և խառը անտառների տակ, հիմնականում երկու կիսագնդերի բարեխառն և մերձարևադարձային շրջաններում (բացառությամբ ծայրահեղ հյուսիսային շրջանների), և երբեմն հանդիպում են արևադարձային գոտիներում:
Տոսախ՝ ամենահին դեկորատիվ բույսերից մեկն է, որն օգտագործվում է կանաչապատման և դեկորատիվ այգեգործության համար: Տուփերը շատ անքմահաճ բույսեր են, աճում են ժայռերի վրա, անտառների եզրերին, թփուտներում և մութ սաղարթավոր անտառներում: Շատ ստվերադիմացկուն, բայց նաև ջերմասեր են:
Դափնու բռնչի՝ երբեմն աճեցվում է որպես դեկորատիվ բույս: Դափնու բռնչին սերում է Հարավային Եվրոպայից, Հարավարևմտյան Ասիայից և Հյուսիսային Աֆրիկայից: Ներմուծվել է Միացյալ Թագավորություն և Եվրոպայի այլ շրջաններ, որտեղ ոչ հազվադեպ վայրիանում է:
Կենսածառ՝ երկար ժամանակ հաջողությամբ օգտագործվում է լանդշաֆտային ձևավորման մեջ այլ փշատերևների հետ միասին: Դա պայմանավորված է նրանով, որ, լինելով մշտադալար, այն կարողանում է վերակենդանանալ տարվա ցանկացած ժամանակահատվածում։ Բացի այդ, այն օդը լցնում է հատուկ հոտով, որը համարվում է բուժիչ մի շարք հիվանդությունների դեպքում։ Այս տեսակը ստվերադիմացկուն է, ցրտադիմացկուն։ Նախընտրում է բավարար խոնավությամբ բերրի կավահողեր, սակայն, ընդհանուր առմամբ, անպահանջ է ինչպես հողի, այնպես էլ նրա խոնավության մակարդակի նկատմամբ: Դիմանում է ինչպես չորությանը, այնպես էլ՝ ավելորդ խոնավությանը։ Լավ է տանում կտրվածքը։
Ֆոտինիա՝ օգտագործվում է դալար ցանկապատերում, դրանք կարող են տնկվել նաև առանձին կամ տարայի մեջ: Որոշ սորտեր առանձնանում են կարմիր սաղարթով։ Այս թփերը պահանջկոտ են, սիրում են խոնավ հող, լավ են տանում երաշտը և կրահողերը, տնկվում են արևի տակ կամ կիսաստվերում։
Հիշեցնենք, որ Վրաստանի ենթակառուցվածքների նախարարությունը շրջաններում, այդ թվում՝ Ախալքալաքում զբոսաշրջությունը զարգացնելու նպատակով, իրականացնում է «Թարմացված շրջաններ» ծրագիրը, որը ենթադրում է քաղաքի կենտրոնական հրապարակի և գլխավոր փողոցի բարեկարգում՝ ներառյալ շենքերի ճակատային մասերը։
