Ֆինանսների նախարար Լաշա Խուցիշվիլին «Նախարարի ժամ» ձևաչափում իր ելույթի ժամանակ անդրադարձել է Ռուսաստանի Դաշնության դեմ միջազգային պատժամիջոցների կիրառման գործընթացին: Եվս մեկ անգամ նշել է, որ երկրի մաքսային ծառայության արդյունավետ աշխատանքի արդյունքում անցած մեկ տարում սահմանված պատժամիջոցների խախտման դեպքեր չեն արձանագրվել։
Ինչպես նշել է ֆինանսների նախարարը, Վրաստանում հատուկ մաքսային հսկողության են ենթարկվում բոլոր այն ապրանքները, որոնք ներառված են պատժամիջոցներին մասնակից երկրների կողմից որոշված ցանկում, ինչպես նաև ցանկացած մաքսային գործողություն, որը կարող են իրականացնել պատժամիջոցների ենթարկված անձինք կամ ընկերությունները։
Նախարարն իր խոսքում նշել է, որ միջազգային պատժամիջոցների կիրառման առաջին իսկ օրերից Եկամուտների ծառայության մաքսային վարչության մաքսային ռիսկերի կառավարման բաժնում ստեղծվել է համապատասխան աշխատանքային խումբ:
«Նշված ժամանակահատվածում ստեղծվել են ռիսկերի 16 պրոֆիլներ, որոնց հիման վրա բացահայտվում և վերահսկվում են պատժամիջոցների տակ գտնվող անձանց և ընկերությունների կողմից արգելված ապրանքների տեղափոխումը Վրաստանի մաքսային տարածք, ինչպես նաև տարանցման, արտահանման և վերաարտահանման ընթացակարգերը»,- ասել է Լաշա Խուցիշվիլին:
Ինչպես նշել է նախարարը, պատժամիջոցների կիրառման առաջին օրերից ի վեր մի շարք հանդիպումներ են իրականացվել մեր ռազմավարական գործընկերների հետ՝ միջազգային պատժամիջոցների պատշաճ կառավարման համար անհրաժեշտ տեխնիկական աջակցության վերաբերյալ։ Նրա խոսքով, Վրաստանին հնարավորություն է տրվել մուտք գործել միջազգային պատժամիջոցների ուսուցման DOLFIN հարթակ, և ներկայումս Մաքսային դեպարտամենտի երկու աշխատակից արդեն ստացել են պատժամիջոցների կիրառման փորձաքննության վկայականը։ Նաև, ըստ նախարարի, հնարավոր պատժամիջոցային գործողություններից խուսափելու համար մշտական խորհրդակցություններ են անցկացվում տնտեսվարողների հետ, ինչը կարևոր է կանխարգելման առումով։
«Ընդունվել է մաքսային անցակետերից թույլատրված ապրանքները վերադարձնելու 1020 մաքսային որոշում»,- ասել է ֆինանսների նախարարը։
Ըստ Լաշա Խուցիշվիլիի՝ նշված ապրանքները հիմնականում կենցաղային ապրանքներ են եղել։
Ինչպես նշել է նախարարը, ռազմական և երկակի նշանակության ապրանքները Վրաստանի տարածքում տեղաշարժվելու համար հատուկ թույլտվության կարիք ունեն, որը տրվում է պաշտպանության նախարարության և եկամուտների ծառայության կողմից։
«Նման թույլտվությունների տրամադրումը կասեցվել է ռազմական գործողությունների մեկնարկից ի վեր, և, հետևաբար, թույլտվություններ չեն տրվել։ Ցանկացած երկրի հետ Վրաստանի արտաքին առևտրի վիճակագրական տվյալները հանրային տեղեկատվություն են և համակարգված հրապարակվում են Եկամուտների ծառայության կայքում։ Այս տեղեկատվությունը լիովին հասանելի է ցանկացած շահագրգիռ անձի, և իհարկե, մեր բոլոր գործընկերներին»,- ասել նախարարը։
