Russian      Georgian

Թբիլիսիի երկաթուղային, տրանսպորտային քոլեջում Ախալքալաքի մունիցիպալիտետից ընդամենը 4 ուսանող կա։ Նոր ուսումնական տարվա ուսանողների ընդունելությունն արդեն սկսվել է։

Թբիլիսիի երկաթուղային քոլեջը բացվել է 2019թ.֊ին։ Ախալքալաքի մունիցիպալիտետից քոլեջում սովորում է չորս հոգի։ Վերջիններս քոլեջը կավարտեն այս տարվա հուլիսին։

Երկաթուղային քոլեջն ավարտած ուսանողներին ավտոմատ կերպով, լավ բնութագրի դեպքում, աշխատանքի կընդունեն «Վրաստանի երկաթուղիներ» ՍՊԸ-ում:

«Ամեն ինչ կախված է բնութագրից, քոլեջի շրջանավարտներին առաջարկում են ծրագրի ղեկավարները, դասախոսները, ամեն ինչ կախված է պրակտիկայից, ինչպես նրանք դա կանցնեն։ Հիմա նրանք պրակտիկա են անցում, հետո կլինի քննություն, կավարտեն հուլիսի վերջին, և այդ ժամանակ պարզ կլինի, թե ով ավտոմատ կերպով կընդունվի աշխատանքի»,- ասացին Երկաթուղային քոլեջի վարչակազմից։

Երկաթուղային քոլեջում ուսումը տևում է երկու տարի։

Ախալքալաքցիներն անհամբեր սպասում էին այս քոլեջի բացմանը, որպեսզի սովորեն, ապա աշխատանքի անցնեն Բաքու-Թբիլիսի-Կարս երկաթուղում։

2019 թվականին, երբ երկաթուղային քոլեջը Ախալքալաքում ներկայացրեց ծրագիրը, նշվեց, որ քոլեջը համագործակցության հուշագիր է ստորագրել «Մարաբդա-Կարծախ երկաթուղի» ՍՊԸ-ի հետ, որպեսզի քոլեջի ուսանողներն ուսմանը զուգահեռ, աշխատեն ԲԹԿ-ում։ Ինչպես նաև, ըստ նրանց, իրենք բանակցում էին «Մարաբդա-Կարծախ» ՍՊԸ-ի հետ, Ախալքալաքում քոլեջի մասնաճյուղ բացելու ուղղությամբ, սակայն անցել է երեք տարի, և մասնաճյուղը դեռ չի բացվել, ավելին, քոլեջի ուսանողները չեն կարող պրակտիկա անցնել ԲԹԿ երկաթուղում և այնտեղ ավտոմատ կերպով աշխատանքի անցնել՝ «լավ բնութագրի պարագայում»։

Ինչու քոլեջի և «Մարաբդա-Կարծախ» ՍՊԸ-ի միջև համագործակցությունը չշարունակվեց, ինչպես ակնկալվում էր 2019 թվականին, Jnews-ը կփորձի պարզել և իր ընթերցողին ներկայացնել հաջորդ նյութերում։

Քոլեջում ուսանողների նոր ընդունելությունը հայտարարվել է օրերս և կտևի մինչև օգոստոսի 22-ը։

Օգոստոսի 22-ից հետո հայտնի կդառնա, թե արդյոք քոլեջում կրկին ուսանողներ կլինեն Ախալքալաքի մունիցիպալիտետից։

Տեղացիները հնարավորություն ունեն սովորելու եւ աշխատելու երկաթուղային մասնագիտությամբ