Դամալայի մշակույթի տունը, որը գտնվում էր փլուզման եզրին, վերանորոգվել է և երեկվանից արդեն իր դռներն է բացել սաների առջև։
Հուլիսի 14-ին նորոգումից հետո պաշտոնապես բացվեց Դամալի մշակույթի տունը։ Ասպինձայի շրջանի միակ հայկական գյուղի՝ Դամալայի մշակույթի տունը կառուցվել է 1936 թվականին, վերջին անգամ վերանորոգվել էր մոտ 40 տարի առաջ: 2017 թվականի դեկտեմբերի 16-ին գյուղի «Կարին» պարային խմբի համերգի ժամանակ փլուզվել էր բեմը: Ըստ այդմ Դամալայի մշակույթի տան վարիչ Վարսենիկ Սահակյանի, Դամալայի գյուղապետի և պատգամավորի առաջարկով՝ դիմելով Ասպինձայի քաղաքապետ Ռոստոմ Մագրաքվելիձեին, կարողացել են վերանորոգել մշակույթի տունը։
Մշակութի տան վարիչը ուրախ է, որ արդեն ունեն վերանորոգված մշակույթի տուն։
«Մեծ գյուղ ենք և անհարմար է, որ չունենանք մշակույթի տուն։ Երեք-չորս ամիս տևեց վերանորոգումը։ Կարճ ժամանակահատվածում նորմալ նորոգվեց։ Նորոգվեցին պատերը, բեմը, տեղադրվեցին նոր նստարաններ և լույսեր», – ասաց Վարսենիկ Սահակյանը։
Թե Վարսենիկ Սահակյանը, թե գյուղացիները գոհ են կատարված աշխատանքից, ըստ նրանց առաջվա վիճակի հետ անհամեմատելի է։
Մշակույթի տան բացմանը ներկա են եղել նահանգապետ Բեսիկ Ամիրանաշվիլին, Ասպինձայի քաղաքապետն ու Սակրեբուլոյի նախագահը և այլ պաշտոնյաներ։
Շենքում կատարվել են հետևյալ աշխատանքները՝ սալիկապատում, փայտե հատակի, դուռ-պատուհանի, կախովի առաստաղի վերանարոգման աշխատանքներ, ինչպես նաև կատարվել է բետոնային հարդարման և բազալտե եզրաքարերի տեղադրման աշխատանքներ: Հարթեցվել և ներկվել են սենյակները, տեղադրվել են թատերական աթոռներ: Վերանորոգման ծրագրի պայմանագրային արժեքը կազմել է 224 777 լարի, մշակույթի տան վերանորոգման աշխատանքների ընթացքում աշխատանքով ապահովված է եղել 15 մարդ։
«Սկզբից մեր նստարանների քանակը 305 էր, հիմա դարձավ 150, քանի որ նստարանների չափսը մեծ է, սակայն ոչինչ, բավարար է։ Հետագայում եթե ցանկանաք այլ խմբակներ բացել, երևի սենյակ ավելացնելու կարիք լինի», – ասում է Վարսենիկ Սահակյանը։
Ինչպես ասում է մշակույթի տան վարիչը, նրանք նախատեսում են բացել այլ՝ նկարչական, ասմունքի խմբակներ։ Բացմանը ելույթ են ունեցել Ասպինձայի երգչախումբը և Դամալայի երիտասարդները։
Դամալայի մշակույթի տունը դեռ չի վերանորոգվի
Դամալայում բեմը փլվեց համերգի ժամանակ
Դամալայի մշակույթի տունը՝ փլուզման եզրին
