Ախալքալաքի Խաս Բախչա զբոսայգում Սպասարկման կենտրոնը իրականացնում է կանաչապատման աշխատանքներ:
Ներկայումս վերականգնողական աշխատանքներ են ընթանում Ախալքալաքի կենտրոնական զբոսայգում: Դրան զուգահեռ, այսօր Սպասարկման կենտրոնը սկսել է այգու կանաչապատման աշխատանքները: Այգու այն տարածքներում, որտեղ վերականգնողական աշխատանքներն արդեն ավարտվել են, Սպասարկման կենտրոնի աշխատակիցները լցրել են սեւահող:
Կենտրոնի աշխատակիցները ցանել են նախորդ տարվանից մնացած ցրտադիմացկուն սիզամարգի համար նախատեսված «Կանադա Գրին» -ը: Սպասարկման կենտրոնի տնօրեն Արմեն Բիչախչյանի խոսքով, իրենք զբաղվելու են նաև այգու լուսավորությամբ:
Կանաչապատման համար սպասարկման կենտրոնին հատկացվել է 1000 լարիից մի փոքր ավելի: Բայց դեռ վերջնականապես որոշված չէ ծաղիկներ էլ կտնկվեն, թե միայն Կանադա Գրին ձեռք կբերեն, քանի որ զբոսայգու վերականգնման ընթացքում ծաղիկները կարող են թոշնել շինարարական փոշուց:
«Մեզ են հանձնել զբոսայգին լուսավորելու աշխատանքները, հները կհանենք և դրանց տեղում նոր լուսավորության սյուներ կտեղադրենք: Մոտ 10 սյուն եռակի լուսավորությամբ են, իսկ ընդհանուր առմամբ կտեղադրենք շուրջ 60 նոր լուսավորության սյուն և լուսամփոփ», – ասում է Արմեն Բիչախչյանը:
