Այսօր՝ փետրվարի 21-ին, Վրաստանի խորհրդարանում տեղի կունենան Առաջին Սահմանադրության 100-ամյակին նվիրված միջոցառումներ:
Ինչպես հայտարարում են Վրաստանի խորհրդարանում, միջոցառման շրջանակներում խորհրդարանի խոսնակ Արչիլ Թալակվաձեն և վրացի մեծ հասարակական գործչի ժառանգ, 10-ամյա Էքվթիմե Թաղաիշվիլին կբացեն «Էքվթիմե Թաղաիշվիլիի անվան վրացական պառլամենտարիզմի թանգարան»:
Առաջին Սահմանադրության 100-ամյա հոբելյանին նվիրված տոնական նիստին, որը կկայանա լիագումար նիստերի դահլիճում, ելույթի խոսքով հանդես կգան՝ խորհրդարանի խոսնակ Արչիլ Թալակվաձեն, նախագահ Սալոմե Զուրաբիշվիլին, վարչապետի թեկնածու Իրակլի Ղարիբաշվիլին և Սահմանադրական դատարանի նախագահ Մերաբ Տուրավան:
Նախատեսվում է նաև խորհրդարանական մեծամասնության առաջնորդ, «Վրացական երազանք – ժողովրդավարական Վրաստան» կուսակցության նախագահ Իրակլի Կոբախիձեի, Վրաստանի խորհրդարանի փոխնախագահ Լևան Իոսելիանիի և եվրոպական ինտեգրման հարցերի հանձնաժողովի նախագահ Մակա Բոճորիշվիլիի ելույթները:
Խորհրդարանի մամուլի ծառայության հաղորդմամբ՝ միջոցառման շրջանակներում խորհրդարանական մեծամասնության առաջնորդ, «Վրացական երազանք – ժողովրդավարական Վրաստան»-ի նախագահ Իրակլի Կոբախիձեն պարգևատրվելու է «Ազատության խորհրդարանական շքանշանով»: Իրակլի Կոբախիձեն համապատասխան դրամական պարգևը կփոխանցի ուռուցքաբանական ախտորոշում ունեցող երեխաներին:
Բացի այդ, խորհրդարանի 13 աշխատակիցներ կարժանանան կրծքանշանների օրենսդիր մարմնում առնվազն 25 տարվա հաջող ծառայության համար:
Միջոցառմանը ներկա են գտնվելու՝ Վրաստանի նախագահը, վարչապետի թեկնածուն, ինքնավար հանրապետությունների կառավարությունների և գերագույն խորհուրդների նախագահներ, դիվանագիտական կորպուսի ներկայացուցիչներ, Վրաստանի Սահմանադրական և Գերագույն դատարանների նախագահները, Թբիլիսիի քաղաքապետը, Թբիլիսիի քաղաքային խորհրդի նախագահը, պատրիարքարանի և կրոնական դավանանքների ներկայացուցիչներ, ինչպես նաև Էքվթիմե Թաղաիշվիլիի ազգականները:
