Ախալքալաքի մունիցիպալիտետի Մշակույթի տանը գործող «Ջավախք» ազգագրական երգի-պարի համույթը և վրացական «Մուրջի» համույթը ի պատիվ իրենց հոբելյանների, համապատասխանաբար` 20 և 10 տարի, պարգևատրվել են պատվոգրով:
Այսօր՝ հոկտեմբերի 23-ին, Ախալքալաքի երկու հիմնական պարային համույթները որպես մրցանակ ստացել են պատվոգրեր: «Ջավախք» համույթը նշում է իր 20-ամյակը: Համույթը հիմնադրվել է 2000 թ.-ի, հոկտեմբերի 22-ին: Համույթի հիմնադիրն ու ղեկավարներն են Աշուղ Ալիկ Քսպոյանը և Լամարա Քսպոյանը: Համույթը հիմնականում կատարում է հայկական ազգային պարեր:
«Մուրջի» պարային համույթը 10 տարեկան է: Համույթը հիմնադրվել է 2010 թվականի հոկտեմբերի 10-ին և պարում են հիմնականում վրացական պարեր: «Մուրջի» համույթի ղեկավարն ու հիմնադիրը Գիորգի Մետրեվելին է:
Երկու խմբերում էլ պարում են տարբեր տարիքի և ազգության երեխաներ՝ հայեր, վրացիներ, հույներ:
Երկու համույթներն էլ մասնակցել են տարբեր փառատոների, մրցույթների և ստացել բազմաթիվ մրցանակներ և պատվոգրեր ինչպես Վրաստանում, այնպես էլ արտերկրում: Նրանք արժանապատվորեն ներկայացրել են Ախալքալաքի մունիցիպալիտետը տարբեր միջազգային և պետական փառատոներում:
Համավարակի պատճառով համույթի հոբելյանները լայնորեն չեն նշվում:
Ախալքալաքի մունիցիպալիտետի Կրթության, մշակույթի, սպորտի եւ երիտասարդության հարցերի ծառայության պետ Վալերի Ստելմաշովը բարձր է գնահատում համույթների ներդրումը շրջանի մշակութային զարգացման գործում:
«Երկու համույթների կազմակերպման և ստեղծման առաջին իսկ օրերից ես մասնակցել եմ, և այժմ կարող ենք ասել, որ մունիցիպալիտետն ունի արժանի և կայացած համույթներ: Նրանք մասնակցել են տարբեր միջազգային և պետական մրցույթների, դարձել դափնեկիրներ և մրցանակակիրներ, ստացել բազմաթիվ մեդալներ, գրան-պրի, ինչպես նաև ճանաչում », – ասաց Վալերի Ստելմաշովը:
