Ախալքալաքում՝ բարեգործական համերգով և վարպետության դասով Երաժշտական դպրոցի սաներին է այցելել հայ դաշնակահար, կոմպոզիտոր, էթնոերաժշտագետ, դասախոս, գրող և պրոդյուսեր Շահան Արծրունին։ Նրա այցը նպատակ ունի հանրահռչակել համաշխարհային մշակույթը գավառներից տաղանդավոր երեխաների համար։
Մայիսի 20-ին Շահան Արծրունին վարպետության դաս էր անցկացրել Ախալքալաքի երաժշտական դպրոցի սաների համար, իսկ մայիսի 21-ին հանդես եկավ դասական երաժշտության համերգով Սամցխե-Ջավախքի ՀԱԵ փոխանորդության նիստերի դահլիճում: Մաեստրոյի հետ միասին համերգին ելույթ ունեցան նաև երաժշտական դպրոցի սաները՝ Արսեն Կարապետյանն ու Վարդան Գալիվոնջյանը։
Համերգը լսելու էին եկել Երաժշտական դպրոցի ուսուցիչներն ու սաները, Սամցխե-Ջավախքի և Ծալկայի փոխանորդ, փոխանորդության աշխատակիցներ, Ախալքալաքի քաղաքապետարանի փոխքաղաքապետ Մկրտիչ Մղդեսյանը և այլք։ Կարճ ներկայացրեց Շահան Արծրունու կենսագրությունն ու գործունեությունը Սամցխե-Ջավախքի և Ծալկայի ընդհանուր առաջնորդական փոխանորդ Տ. Նշան վարդապետ Հմայակյանը:
Կոմիտաս, Խաչատրյան, Շոպեն, Ռախմանինով… ոչ շատ, բայց Ախալքալաքի հիացմունքով լի բնակիչները մեկ ժամից ավելի վայելեցին մաեստրոյի և տեղացի տաղանդների կատարումները: Շահան Արծրունին ներկայացմանը զուգահեռ նաև գրավիչ կերպով պատմեց հետաքրքիր պահեր կոմպոզիտորների կյանքից:
«Մարզերի բնակիչները, ինչ-որ չափով զրկված են հնարավորությունից առնչվելու նրան, ինչ կա սփյուռքում: Այս ծրագրի շրջանակներում ես գալիս եմ Վրաստան առաջին անգամ, հուսով եմ, որ քաղաքներ այցելելու ևս հնարավորություն կլինի, որտեղ ապրում են հայերը: Այս ծրագրի նպատակը նախ ծանոթանալն է հայ երեխաներին, ովքեր հաճախում են երաժշտական դպրոցներ, բայց չունեն այս փոքրիկ վայրերից դուրս գտնվողներին լսելու հնարավորություն: Իմ նպատակը ևս ծանոթացնելն է նրանց այն ամենին, ինչ կա աշխարհում՝ իրենց բնակության վայրից դուրս», – ասում է Շահան Արծրունին։
Ականավոր դաշնակահարի այցը կազմակերպել և ֆինանսավորել է ՀՕՖ-ը: Այս ծրագրի շրջանակում, Շահան Արծրունին համանման ծրագրով այցելել է և կայցելի Հայաստանի ընդհանուր 7 քաղաք, ծրագրում ընդգրկված էր նաև Ախալքալաքը։
Շահան Արծրունին նաև մեկ այլ նպատակ ունի՝ հավաքել հայ կոմպոզիտորների ձայնագրություններով
հին ձայնասկավառակները, թվայնացնել ու ներկայացնել համայն աշխարհին։
