Այսօր՝ ապրիլի 15-ի առավոտյան, ժամը 10:00-ից Վրաստանի խորհրդարանի հետևի մուտքի մոտ հասարակական կազմակերպությունների և ԶԼՄ-ների ներկայացուցիչները պարզել են պաստառներ՝ «Ո՛չ ռուսական օրենքին» գրությամբ։ «Վրացական երազանք» խմբակցության ներկայացրած «Օտարերկրյա ազդեցության թափանցիկության մասին» օրենքի նախագիծը քննարկվում է խորհրդարանական իրավական հարցերի հանձնաժողովի կողմից։
Ինչպես հաղորդում է Jnews-ի թղթակիցը, առավոտյան տեղում ավելի շատ ոստիկաններ են մոբիլիզացվել, քան եղել են բողոքի ակցիայի մասնակիցները, իսկ ավելի ուշ նրանց են միացել նաեւ հատուկ ջոկատայինները։
«Վրաստանի եվրոպական ապագայի համար պայքարը շարունակվում է: Մի՛ մնա տանը, դուրս արի փողոց: «Ռուսական օրենքը» վերաբերում է Վրաստանի բոլոր քաղաքացիներին: «Ռուսական օրենքը» մեծ պատ է Վրաստանի և Եվրոպայի միջև: Այո՝ Եվրոպային: Ոչ՝ ռուսական օրենքին»,- ասվում է սոցցանցում կազմակերպիչների տարածած տեղեկատվության մեջ։
Լրագրողները դուրս են եկել բողոքի, քանի որ կարծում են, որ եթե այս օրինագիծն ընդունվի, ապա անկախ լրագրության վրա ճնշումներ կսկսվեն։
Բողոքի ակցիային աստիճանաբար միացել են ուսանողները, որոնց գալուստով ցուցարարների թիվը կրկնապատկվել է։
Բողոքի ակցիային միացել են նաեւ Վրաստանում տարբեր դեսպանատների ներկայացուցիչներ։
Նշենք, որ այս օրինագծին կից դիտարկվելու է երկու այլընտրանքային նախագիծ. մեկը «Օկուպանտ երկրի՝ Ռուսաստանի Դաշնության ազդեցությունից պաշտպանվելու մասին» նախագիծն է և Քրեական օրենսգրքում փոփոխությունները, իսկ մյուսը՝ «Դրամաշնորհների մասին» և «Հաշվապահական հաշվառման, հաշվետվողականության և աուդիտի մասին» օրենքում նախապատրաստված փոփոխությունները»:
Երեկոյան ժամը 19:00-ին օրինագծի դեմ հանրահավաք տեղի կունենա նաեւ խորհրդարանի դիմաց։
«Օտարերկրյա ազդեցության թափանցիկության մասին» օրինագծի հեղինակն ու նախաձեռնողը «Վրացական երազանք»-ն է։ Դրա բովանդակությունը նույնանման է նախորդ տարի նախաձեռնված և բողոքի ցույցերի արդյունքում «տապալված» նախագծին։
«Օտարերկրյա ազդեցության թափանցիկության մասին» օրենքի նախագծով նախատեսվում է «թափանցիկություն ապահովելու նպատակով» որպես օտարերկրյա իշխանության շահերը հետապնդող կազմակերպություններ գրանցել այնպիսի ոչ ձեռնարկատիրական (ոչ առևտրային) իրավաբանական անձանց և ԶԼՄ-ների՝ որոնց եկամուտի որոշակի մասը, մասնավորապես՝ ավելի քան 20%-ը, ստացվում է արտերկրից։ Նախագծի համաձայն՝ յուրաքանչյուր ոք, ով համարվում է «օտար ուժի շահերը կրող կազմակերպություն», պետք է գրանցվի հանրային ռեգիստրի համանուն բազայում։ Գրանցման ժամանակ հարկավոր է արտացոլել ստացված եկամուտը: Միաժամանակ կազմակերպություններից կպահանջվի տարեկան լրացնել ֆինանսական հայտարարագիր։
Ինչ վերաբերում է այլընտրանքային օրինագծերին, ապա դրանք նախաձեռնել է «Վրաստանի համար» խորհրդարանական քաղաքական խումբը, կամ «Օկուպանտ երկրի՝ Ռուսաստանի Դաշնության ազդեցությունից պաշտպանվելու մասին» նախագծով որոշվում է օկուպանտ երկրի՝ Ռուսաստանի Դաշնության ուժը, օկուպանտ երկրի ազդեցության գործակալը, և, ելնելով օկուպանտ երկրի շահերից, և դրա օգտին արգելվում են գործողություններ, որոնք ուղղված են Վրաստանի ազգային շահերին վնասելուն, այդ թվում՝ թույլ չտալ Վրաստանի լիակատար ինտեգրումը Եվրամիությանը և ՆԱՏՕ-ին:
«Դրամաշնորհների մասին» և «Հաշվապահական հաշվառման, հաշվետվողականության և աուդիտի մասին» օրենքներում նախապատրաստված փոփոխությունների համաձայն, որոնք «Օտարերկրյա ազդեցության թափանցիկության մասին» օրինագծին այլընտրանք են հանդիսանում, ցանկացած դրամաշնորհ ստացող, որը ֆինանսավորվում է ինչպես Վրաստանից, այնպես էլ՝ արտերկրից, կպարտավորվի տարեկան հաշվետվություն ներկայացնել համապատասխան մարմնին՝ հաշվետու տարվա ավարտից երեք ամիս առաջ: Տարեկան հաշվետվությունը պետք է ներառի տեղեկատվություն դրամաշնորհառուի կողմից հաշվետու տարվա ընթացքում ստացված յուրաքանչյուր դրամաշնորհի մասին, ներառյալ դրամաշնորհի նպատակը, ծավալը և դրամաշնորհի պայմանագրում նշված այլ հիմնական պահանջները:
