Այսօր՝ հուլիսի 9-ին, ժամը 12:30-ից Թբիլիսիի Սուրբ Գևորգ առաջնորդանիստ եկեղեցու բակում՝ ի նշանավորում հայ ժողովրդի միասնության նշվեց «Տոլմա-2023» ավանդական փառատոնը:
Փառատոնն իրականություն դարձավ Վրաստանի հայ կանանց «Շուշանիկ» միության մասնակցությամբ և Վիրահայոց թեմի առաջնորդ Հոգեշնորհ Տեր Կիրակոս վարդապետ Դավթյանի օրհնությամբ: Ներկա էին Թբիլիսիի տարբեր հայկական կառույցների և հասարակական կազմակերպությունների ներկայացուցիչներ և այլք:
Փառատոնին ներկայացվեցին թբիլիսահայ տիկնանց կողմից պատրաստված տոլմայի տարատեսակներ, սառը ըմպելիքներ և ըստ ավանդույթի քաղցրավենիքներ: Ներկաները հնարավորություն ունեին համտեսելու հայկական ավանդական ուտեստի լայն տեսականին և կիսվել իրենց կարծիքներով: Փառատոնը մեծ ուշադրություն գրավեց նաև զբոսաշրջիկների կողմից, նրանք հետաքրքրությամբ և ոգևորությամբ մասնակցեցին տոնակատարությանը, տեղեկություն ստացան հայկական ավանդական ուտեստի և մշակույթի մասին:
Հյուրասիրությունն ուղեկցվեց տոնական ուրախ համերգով, ելույթ ունեցան «Հայարտուն» մշակութային և կրթական կենտրոնի սաները, նաև ներկաները շուրջպար բռնեցին:
Փառատոնը շարունակական բնույթ է կրում, և ամեն տարի իրականացվում է Թբիլիսիի հայ համայնքի կողմից:
