Համացանցում ստորագրահավաք է սկսվել՝ Եվրամիությանն ու ՆԱՏՕ-ին Վրաստանի անդամակցության գործընթացին աջակցելու խնդրագրի ներքո:
Հայտարարված նպատակը Վրաստանի ժողովրդից մեկ միլիոն ստորագրություն հավաքելն է։
Ներկայացնում ենք ամբողջական տեքստի անփոփոխ թարգմանությունը.
«Ես՝ Վրաստանի քաղաքացիս, անկախ իմ քաղաքական պատկանելությունից, աջակցում եմ Վրաստանին ԵՄ թեկնածուի կարգավիճակ շնորհելուն և Եվրամիությանն ու ՆԱՏՕ-ին Վրաստանի անդամակցությանը։
Քանի որ Վրաստանի կառավարությունը չի կատարում իր սահմանադրական պարտավորությունը Եվրամիությանը և ՆԱՏՕ-ին Վրաստանի անդամակցության վերաբերյալ, ես համաձայն եմ, որ արևմտամետ ընդդիմության ներկայացուցիչները իմ անունից բանակցություններ վարեն մեր արևմտյան գործընկերների հետ։ ԵՄ-ի թեկնածուի կարգավիճակի և, որպես հետևանք, Վրաստանի՝ ԵՄ-ին և ՆԱՏՕ-ին անդամակցելու կարևորագույն հարցի շուրջ»։
Ստորագրահավաքի մասին նախապես հայտարարել էին երեք ընդդիմադիր կուսակցություններ՝ «Գիրչի»-ն, «Դրոա»-ն և «Ռազմավարություն Աղմաշենեբելի»-ն:
«Արշավի նպատակն է արտահայտել վրաց ժողովրդի կարծիքն այն մասին, որ Վրաստանն արժանի է լինել Եվրամիության և ՆԱՏՕ-ի անդամ, և ոչ մի կառավարություն չի կարող վերանայել այդ նպատակը»,- հայտարարել է «Ռազմավարություն Աղմաշենեբելի»-ի ղեկավար Գիորգի Վաշաձեն։
Վերջինիս խոսքով, օտարերկրյա գործակալների մասին օրենք ընդունելու և դրանով իսկ խարանելու հասարակական կազմակերպություններին և ԶԼՄ-ներին, իշխանությունները հաստատել են, որ ցանկանում են երկիրը տանել ռուսական ճանապարհով, և դրան պետք է դիմակայել։
Սա ընդդիմության միակ նախաձեռնությունը չէ՝ ի պատասխան օտարերկրյա գործակալների մասին օրինագծերին, որոնք արդեն սկսել են քննարկվել խորհրդարանական հանձնաժողովներում։
«Միացյալ ազգային շարժումն» այսօր հայտարարել է, որ ստեղծում է ռուսական ազդեցության գործակալների ռեեստր, իսկ «Հանուն Վրաստանի» կուսակցությունը խորհրդարանում գրանցել է «Օկուպացված երկրի՝ Ռուսաստանի Դաշնության ազդեցությունից պաշտպանության մասին» օրենքի նախագիծը։
Ի պատասխան ինչպես Վրաստանում, այնպես էլ միջազգային կազմակերպությունների կողմից քննադատության ալիքին՝ իշխանությունները նշում են, որ օտարերկրյա գործակալների մասին օրենքի գաղափարը չի հակասում ժողովրդավար սկզբունքներին, այլ միտված է արտերկրից ֆինանսավորման աղբյուրների թափանցիկությանը։
Օտարերկրյա գործակալների մասին ապագա օրենքի երկու տարբերակներն էլ ընդդիմության, լրատվամիջոց ԶԼՄ-ների ներկայացուցիչների և ՀԿ-ների բողոքի ֆոնին այսօր հավանության արժանացան խորհրդարանի Արտաքին հարաբերությունների և Պաշտպանության հանձնաժողովների կողմից։
Ակնկալվում է, որ Իրավական հարցերի հանձնաժողովն օրինագծերը կքննարկի հաջորդ շաբաթ։
Աղբյուրը՝ «NewsGeorgia»