---

Այսուհետ վարորդական իրավունք ստանալու կամ այլ փաստաթղթային գործողություններ կատարելու համար Ախալքալաքի սպասարկման գործակալությունը կգործի շաբաթական երկու օր՝ ուրբաթ եւ հինգշաբթի։ Ինչպես նաև ավելացվել են Գործակալության ծառայությունները, որոնք մատուցվում են Ախալքալաքում:

Ինչպես ՆԳՆ սպասարկման գործակալությունից Jnews-ին հայտնեցին՝ գործակալության Ախալցիխե-Ախալքալաք ծառայության աշխատակիցներն Ախալքալաքի շրջանային վարչությունում, յուրաքանչյուր շաբաթվա հինգշաբթի և ուրբաթ օրերին քաղաքացիներին տարբեր ծառայություններ կմատուցեն։

Այսուհետ նաև կմատուցվեն որոշ ծառայություններ, որոնց համար մինչ այս ախալքալաքցիներն ու նինոծմինդացիները ստիպված էին լինում հասնել Ախալցիխե:

Ներկայացնում ենք այն ծառայությունների ցանկը, որոնք իրականացվում են Ախալքալաքի սպասարկման գործակալությունում՝

• տրանսպորտային միջոց վարելու իրավունք ստանալու տեսական թեստ,
• A1, A2 և B (առաջին փուլ) վարորդական իրավունքի վկայականի գործնական քննություն,
• տրանսպորտային միջոցների վարորդական վկայականների փոփոխություն և կորցրած վկայականի վերականգնում,
• տրանսպորտային միջոցների մաքսազերծում և գրանցում,
• զենքի գրանցում,
• Գործակալության կողմից տրված տարբեր տեսակի ծանուցումների, դիմումի ընդունում և պատրաստի փաստաթղթի տրամադրում։

Հարկ է նշել, որ մինչ այս գործակալությունը Ախալքալաքում գործում էր միայն ուրբաթ օրերին և ոչ բոլոր ծառայություններն էր մատուցվում։ Ինչ վերաբերում է վարորդական իրավունքի երկրորդ փուլի քննություններին, ապա այն դեռ իրականացվում է Ախալցիխեում։