«Երկուշաբթի օրը խափանվել է ԼՂ-ին ՀՀ-ից էլեկտրաէներգիա մատակարարող էլեկտրագծի աշխատանքը: Խափանումը տեղի է ունեցել Ադրբեջանի վերահսկողության տակ գտնվող տարածքում և մինչև այս պահը վերականգնողական աշխատանքներ իրականացնելու հնարավորություն չի ընձեռվել ո՛չ ԼՂ համապատասխան ծառայություններին, ո՛չ խաղաղապահներին, ո՛չ էլ որևէ տեղեկություններ կան վերականգնողական աշխատանքներ իրականացնելու կամ ընթացքի վերաբերյալ»,- կառավարության այսօրվա նիստի մեկնարկին հայտնել է Նիկոլ Փաշինյանը: Փոխանցում է Panorama.am-ը:

Ասելով որ ԼՂ-ին էլեկտրաէներգիայի մատակարարման խափանումը նոր հիմնահարցեր է ստեղծել՝ Փաշինյանը տեղեկացրել է, որ Արցախում սկսվել են հովհարային անջատումները:

«Մանկապարտեզները գործում են ոչ լիարժեք, այդ թվում՝ սահմանված չափանիշներին համապատասխանող սննդի բացակայության պատճառով: Փակվում են աշխատատեղեր՝ էլ ավելի սրելով սոցիալական վիճակը Լեռնային Ղարաբաղում»,- ասել է ՀՀ գործադիր մարմնի ղեկավարը:

Փաշինյանը հայտարարել է, որ իր գնահատականը մնում է նույնը, ըստ որի՝ Ադրբեջանի կողմից Լաչինի միջանցքի արգելափակումը սեփական հայրենիքում ապրելու Լեռնային Ղարաբաղի հայության կամքը կոտրելու նպատակ ունի, բայց հավատում է, որ այդ կամքն անկոտրում է:

Նա անդրադարձել է նաև իրավիճակի հանգուցալուծման պատկերացումներին և ասել. «Այս հարցում էլ, իմ ընկալմամբ, Լեռնային Ղարաբաղի ժողովրդի և իշխանության արձագանքը պետք է լինի ասիմետրիկ: Ի՞նչ է սա նշանակում: Առաջին հերթին՝ վերջին տարիների զարգացումների, դրանց խորքային իմաստների և պատճառների հետ պետք է առերեսվել այն կտրվածքով, որ իրադարձությունների, իրադրություններիր մեր գնահատականները պետք է լինեն փաստահենք: Այս առումով պետք է առաջին հերթին խուսափել իրադրությունն էլ ավելի փակուղային դարձնող քաղաքական հայտարարություններից, որովհետև վերջնակետին հասնելու հստակ պատկերացումներով չզուգորդված հայտարարություններն որևէ օգուտ չեն տալիս, և հետո Ադրբեջանի և Լեռնային Ղարաբաղի միջև պետք է սկսվի քաղաքական խոսակցություն և ԼՂ-ի մեր գործընկերները պետք է հնարավորություն չտան, որ որևէ մեկը իրենց մեղադրի կառուցողական խոսակցությունն խափանելու, կամ նման խոսակցությունն անհնար դարձնելու մեջ: Լաչինի միջանցքի փակումը սադրանք է, որի վերջնական նպատակը նոր ռազմական էսկալացիան է և չպետք է իրականացնել քայլեր, որոնք ցանկալի են ռազմական էսկալացիայի սցենարը մշակողների համար: Այս սադրանքի և էսկալացիայի նպատակներից մեկը Բաքվի և Ստեփանակերտի միջև քաղաքական և պաշտոնական խոսակցության ակնհայտ անհրաժեշտության քողարկելն ու օրակարգից դուրս մղելն է: Չպետք է արվեն գործողություններ, որոնք նպաստում են այս սադրիչ խնդրի լուծմանը»:

Փաշինյանի խոսքով՝ ՀՀ դիվանագիտական կառույցները և արտերկրի կառույցները պետք է կրկնապատկեն ջանքերը ԼՂ-ում հումանիտար ճգնաժամի միջազգային տեսանելիությունը մեծացնելու և տարբեր ատյաններում այն քննարկման առարկա դարձնելու ուղղությամբ: