Հայաստանի վարչապետ Նիկոլ Փաշինյանն իր վրաց գործընկեր Իրակլի Ղարիբաշվիլիի միջոցով առաջարկություն է փոխանցել Ռեջեփ Թայիփ Էրդողանին՝ հանդիպելու համար: Այս մասին հայտարարել է անձամբ Թուրքիայի նախագահը:

Նա նշել է, որ մի կողմից Փաշինյանը դեմ է Զանգեզուրի միջանցքի բացմանը, իսկ մյուս կողմից` հանդիպման է հրավիրում: Էրդողանի խոսքով՝ սա քաղաքական հարց է, որը կարող է վերացնել դժվարությունները Երեւանի և Բաքվի միջև հարաբերություններում:

«Սա մտածելու առիթ է տալիս։ Եթե ցանկանում եք հանդիպել, ապա պետք է դրական քայլեր ձեռնարկել։ Մենք փակ չենք հանդիպումների համար։ Վրաստանի վարչապետն ինձ փոխանցել է Հայաստանի վարչապետ Նիկոլ Փաշինյանի հանդիպում ունենալու առաջարկը։ Բայց դրա համար Հայաստանը պետք է ձեռնարկի դրական քայլեր։ Եթե այդ հանդիպումը կայանա, ապա Թուրքիան էլ կկարողանա հաստատել դիվանագիտական հարաբերություններ»,- հավելել է Էրդողանը:

Հիշեցնենք, որ սեպտեմբերի 8-ին Նիկոլ Փաշինյանը պաշտոնական այցով ժամանել էր Թբիլիսի, որի ընթացքում հանդիպել էր վարչապետ Իրակլի Ղարիբաշվիլիի հետ: Այցը Բաթումում ավարտվեց երկու կառավարությունների ղեկավարների ոչ պաշտոնական հանդիպմամբ: Ավելի ուշ ԶԼՄ-ները հայտնեցին, որ այդ օրը Փաշինյանը հանկարծակի 3-4 ժամով «անհետացել» է, և ո՛չ վրացական կողմը, ո՛չ Հայաստանի վարչապետի արարողակարգի աշխատակիցները չգիտեն նրա գտնվելու վայրի մասին: