Ախալքալաքում, այն մարդկանց, ովքեր զբաղվում են փողոցային առևտրով, օգոստոս ամսից զգուշացվել է, որ իրավունք կունենան առևտուր անել մինչև սեպտեմբերի 15-ը, իսկ դրանից հետո ստիպված են լինելու ազատել Նալբանդյան փողոցը: Այսօր քաղաքային իշխանությունները վերջնաժամկետը նշում են սեպտեմբերի 19-ը:
Ախալքալաքի քաղաքապետ Մելքոն Մակարյանի խոսքով, քանի որ նախադպրոցական առևտրի թեժ շրջանն էր՝ զիջման գնալով առևտրականներին թույլատրվել է մինչև սեպտեմբերի 15-ը շարունակել փողոցում առևտուր անել: Սակայն ժամկետը կրկին երկարաձգվել է մինչև երկուշաբթի օրը: Սեպտեմբերի 19-ից կգործեն արգելքներ:
«Քանի որ սեպտեմբերի 15-ին սկսվում էին դասերը, մենք ժամանակ տվեցինք նրանց որպեսզի այս ընթացքում կատարեն առևտուր: Երկուշաբթի արդեն համապատասխան մարմինների, ճանապարհային ոստիկանության ներկայացուցիչների հետ կգնանք և տեղում առևտրականների հետ համաձայնության գալով վերջնական կլուծենք հարցը», – Jnews-ին ասաց Ախալքալաքի քաղաքապետ Մելքոն Մակարյանը:
Նշենք, որ կառավարության որոշմամբ ամբողջ երկրի տարածքում արգելվում է փողոցային առևտուրը:
