Սուխումի պետական համալսարանի պատվավոր դոկտորի կոչում է շնորհվել Ախալքալաքում ծնված, վրացի նշանավոր թուրքագետ, Սամցխե-Ջավախքի պետական համալսարանի պրոֆեսոր, Թուրքական պատմական հասարակության անդամ-թղթակից պրոֆեսոր Ռոին Ղավրելիշվիլիին։
2022 թվականի հուլիսի 27-ին Սուխումի պետական համալսարանում տեղի է ունեցել միջազգային կարևոր իրադարձություն, որը վրաց-թուրքական գիտական հարաբերությունների հերթական հաջող դրսևորումն էր։
Ըստ պարոն Ռոինի՝ «պատվավոր դոկտորի կոչումը շատ հուզիչ զգացում է գիտնականի համար, դա յուրահատոկ հարգանքի արտահայտություն է գիտնականի կատարած աշխատանքի հանդեպ»:
Միջոցառմանը ներկա է եղել Վրաստանում Թուրքիայի դեսպան Ալի Քաան Օրբայը։
Վերջին մի քանի տարիներին երկու երկրների պատմաբանների մասնակցությամբ անցկացվում է վրաց-թուրքական պատմական հարաբերությունների վերաբերյալ միջազգային սիմպոզիում։ 2021 թվականին տեղի ունեցավ չորրորդ անընդմեջ միջազգային սիմպոզիումը, որը հյուրընկալել էր Սուխումի համալսարանը։ Սիմպոզիումի թեման վերջին շրջանի վրաց-թուրքական հարաբերություններն էին, այս աշխատանքները պրոֆեսորներ Ռոին Ղավրելիշվիլիին և Իբրահիմ Թելլիօղլուին բերեցին պատվավոր դոկտորի կոչում։
«Սիմպոզիումներ թուրքական կողմից կազմակերպել էր մեր գործընկեր Իբրահիմ Թելիիօղլուն՝ Սամսունի մայիսի 19-ի համալսարանի պրոֆեսոր, իսկ վրացական կողմից՝ ձեր խոնարհ ծառան։ Կազմկոմիտեի կողմից հրատարակվել են նշված գիտական սիմպոզիումների աշխատությունների հինգ ժողովածու։ Այս աշխատանքները տպագրվել են վրացերեն և թուրքերեն լեզուներով, հոդվածների մեծ մասը թարգմանվել է երկու լեզուներով՝ իմ և իմ երիտասարդ գործընկեր Գելա Գունիավայի կողմից»,- ասում է Ռոին Ղավրելիշվիլին։
Նրա խոսքով՝ հեշտ չէ տարբեր երկրների պատմաբաններ հավաքել ու ընդհանուր կարծիքի գալ որոշ վիճահարույց հարցերի շուրջ։ Բայց կարեւոր է, որ վիճելի հարցերը միշտ քննարկվել են կոլեգիալ մթնոլորտում։
«Մենք և թուրք պատմաբանները շատ հարցերում չենք կարող նույն հայտարարի գալ, բայց վիճելի հարցերը միշտ քննարկվել են կոլեգիալ մթնոլորտում։ Մենք ծանոթանում ենք պատմության միտումներին, միմյանց հետ կիսվում նախկինում անհայտ Վրաստանի վերաբերյալ թուրքական աղբյուրների փաստերով, և Թուրքիային վերաբերող վրացական աղբյուրների փաստերով»։
Ռոին Ղավրելիշվիլին ունի տարբեր լեզուներով (վրացերեն, ռուսերեն, թուրքերեն, անգլերեն, հայերեն) հրատարակված շուրջ 70 գիտական հոդվածներ: Նրա հեղինակությամբ և համահեղինակությամբ հրատարակվել է 5 գիրք։ Նա ակտիվորեն մասնակցում է Հայաստանում, Թուրքիայում, Ռուսաստանում, Իրանում, Իսրայելում, Արևելյան Եվրոպայի և Կենտրոնական Ասիայի երկրներում անցկացվող միջազգային սիմպոզիումներին։ Նա մի քանի միջազգային մրցավարական ամսագրերի խմբագրական խորհրդի անդամ է։
Ռոին Ղավրելիշվիլին երկար տարիներ աշխատել է Ջավախքում, եղել է Իվանե Ջավախիշվիլիի անվան Թբիլիսիի պետական համալսարանի Ջավախքի մասնաճյուղի տնօրենը և Ախալքալաքի բարձրագույն ուսումնական հաստատության՝ քոլեջի ռեկտորը։ Ներկայումս, այլուր կարդացած դասախոսություններին զուգահեռ, նա դասախոսություններ է կարդում Ախալքալաքում գտնվող Սամցխե-Ջավախքի պետական համալսարանի երրորդ մասնաշենքում։
«Ջավախեթին իմ հայրենիքն է, որտեղ ես ծնվել և մեծացել եմ: Հենց այստեղ, այս անկյունում, բազմազգ միջավայրում ձևավորվեց իմ աշխարհայացքը, ես կփորձեմ արժանապատվորեն ծառայել նրան»,- ասում է Ռոին Ղավրելիշվիլին։
Ռոին Ղավրելիշվիլին նաև հրավիրյալ պրոֆեսոր է Կարսի Կովկասի համալսարանում։ Բացի այդ, նա 7 տարի եղել է Արդահանի համալսարանի հրավիրյալ պրոֆեսոր և Արդահանի համալսարանի վրաց լեզվի և գրականության ամբիոնի հիմնադիրը։ 2015 թվականին Ռոին Ղավրելիշվիլիին շնորհվել է Գորիի պետական համալսարանի պատվավոր դոկտորի կոչում։
