Ալինա Գուլանյանն իր ուժեղ կամքով և աշխատասիրությամբ կարողացել է հաղթահարել բազում փորձություններ և հիմա կրթություն է ստանում Իսպանիայում, ճանապարհորդում եվրոպական երկրներում՝ իր համար բացահայտելով տարբեր մշակույթները:

Ծնունդով Ախալքալաքի շրջանի Գոման գյուղից Ալինա Գուլանյանը նախնական կրթությունը ստացել է գյուղի հանրային դպրոցում, ապա էքստեռն կարգով քննություն է հանձնել և 11-րդ դասարանում ավարտել դպրոցը: Այնուհետև մասնակցել է ազգային միասնական քննություններին և ընդունվել Երևանի պետական համալսարանի եվրոպական լեզուներ և հաղորդակցության ֆակուլտետի իսպաներեն-անգլերեն բաժինը: Այժմ ուսանում է 3-րդ կուրսում, զուգահեռ հաճախում մանկավարժական բլոկի՝ մանկավարժական որակավորում ստանալու համար:

Դեռ դպրոցական տարիներին Ալինան մասնակցել է Access ծրագրին, որը շատ մեծ նշանակություն է ունեցել նրա կյանքում: Շնորհիվ այս ծրագրի նա բարելավել է անգլերենի իմացությունը, զարգացրել մտահորիզոնը, նոր ընկերներ է ձեռք բերել, մասնակցել մի շարք թրեյնինգների և այլն:

«Ծրագրին մասնակցելուվ հասկացա, որ անգլերենն իմն է, ես այդ լեզուն շատ եմ սիրում և ուզում եմ ավելին իմանալ: Հենց այդ ժամանակ էլ որոշեցի ապագա մասնագիտությունս, ընթացքում հասկացա, որ հակում ունեմ նաև իսպաներենի հանդեպ: Իմ մոտիվացիան այն էր, որ գիտակցում էի, եթե ընտրել եմ այդ մասնագիտությունը, ապա մինչև վերջ պետք է պայքարեմ որպեսզի հասնեմ իմ նպատակին»:

Ալինան հիմա սովորում է Իսպանիայի Ալմերիա քաղաքի Ալմերիա համալսարանում, որտեղ գնացել է Erasmus+ ծրագրի շրջանակներում, որը առաջարկում է ուսանողների փոխանակում: Այս ծրագիրն Ալինային ինքնաճանաչվելու, սեփական հնարավորությունները գիտակցելու և ընտանիքից հեռու ապրելու ուժ է տվել:

«Erasmus+ ծրագիրը ինձ շատ է օգնել: Նախ սկսեմ նրանից, որ այն մեծ ազդեցություն ունեցավ իմ ինքնուրույն դառնալու վրա, չնայած դժվարություններին: Գալով Իսպանիա, ես մշակութային շոկ ապրեցի, մեր և նրանց մշակույթների տարբերությունը շատ մեծ է»:

alina alina

Մեր հերոսուհին բացի անգլերենից և իսպաներենից ուսումնասիրում է նաև չինարեն, և նրա երազանքն է դառնալ որակյալ և պահանջված թարգմանիչ:

«Երբ դպրոցական էի, մտքովս անգամ չէր անցնում, որ երբևէ կկարողանամ հասնել այս ամենին: Աշխարհագրության դասաժամին միշտ քարտեզի վրա մատս դնում էի եվրոպական երկրների վրա և մտքումս մտածում, ասելով՝ երանի այնտեղ ապրող մարդկանց: Ինձ համար իրական չէր թվում, որ մարդիկ կարող են գնալ և տեսնել այդ ամենը: Բայց արի ու տես, որ կյանքում ամեն բան հնարավոր է»:

Ալինա Գուլանյանը հասցրել է լինել Իսպանիայում, Ֆրանսիայում, Բելգիայում, Նիդեռլանդներում, Պորտուգալիայում և Իտալիայում, առաջիկայում պատրաստվում է Հունաստան գնալ:

alina pariz

Մեր այն հարցին, արդյո՞ք նա ցանկություն ունի հետագայում վերադառնալ ծննդավայր, Ալինան պատասխանում է.

«Չէի ցանկանա վերադառնալ գյուղ ապրելու համար, բայց երբեք չեմ մոռանա, թե ով եմ ես, որտեղ եմ ծնվել: Որպես մարդ կայացման ճանապարհին շատ մեծ է եղել իմ դպրոցի դերը: Իմ ուսուցիչներն ինձ առաջ շարժվելու մոտիվացիա էին տալիս: Երբեք կապը չեմ կորցնի ծննդավայրիս հետ, և առաջին իսկ հնարավորության դեպքում կփորձեմ օգնել շրջանիս ու գյուղիս»:

gulanyan alina

Ալինան իր փորձից ելնելով խորհուրդ է տալիս, երբեք չվախենալ փորձություններից և դժվարություններից: Չթողնել, որ ինչ-որ մեկը կամ ինչ-որ մի բան խանգարի նպատակին հասնելու համար: Չհանձնվել ձախողումներից, քանզի մեկ կամ երկու անգամ ընկնելուց հետո, երրորդ քայլից կհասնես երազանքիդ: