
Բուլղարիայում ընթացող Եվրոպայի բռնցքամարտի առաջնությունում Ախալքալաքի մարզահամալիրի սան Գոռ Այվազյանը րոպեներ առաջ հաղթելով ադրբեջանցի մարզիկին նվաճեց արծաթե մեդալ։ Մեր բռնցքամարտիկը վաղը կպայքարի Եվրոպայի չեմպիոնի տիտղոսի համար։
Պատանի բռնցքամարտիկը եզրափակչում ոսկե մեդալի համար կմենամարտի Ալբանիան ներկայացնող մարզիկի հետ։ Եզրափակիչ մրցումը տեղի կունենա վաղը, ապրիլի 21-ին։
Նշենք, որ ախալքալաքցի մարզիկը տարբեր միջազգային մրցույթների մրցանակակիր և մեդալակիր է։ Անցյալ տարի նա դարձել էր նաև Չեռնոգորիայի մրցումների չեմպիոն։ Գոռը 2019 թվականի Եվրոպայի պատանիների չեմպիոն է հանդիսանում։ Երիտասարդ բռնցքամարտիկը մարզվում է Ախալքալաքի մարզահամալիրում՝ մարզիչ Գագիկ Էլիզբարյանի մոտ։ Բռնցքամարտիկը 17 տարեկան է։