Այս պահի դրությամբ Նինոծմինդայի մանկատունը հերթական աշխատանքային խորհրդակցությունն է անցկացնում ՅՈՒՆԻՍԵՖ-ի, Առողջապահության նախարարության, Պատրիարքարանի և World Vision-ի մասնակցությամբ: Հանդիպման արդյունքում պետք է որոշում կայացվի` արդյոք մանկատունը լուծարկվելու է, թե՞ բաժանվելու է տեղում փոքրիկ մանկատների, և, առհասարակ, ի՞նչ է լինելու այս հաստատության հետ:
Արդեն մի քանի օր է Սուրբ Նինոյի մանկատունը «հսկում են» լրագրողները, ամեն օր տարբեր պետական կառույցներ և ոստիկանությունը հանդիպում են սաների և դաստիարակների հետ: Այս պահին մանկատանը տեղի է ունենում ընդլայնված ձևաչափով հանդիպում: Հանդիպմանը մասնակցում են Առողջապահության փոխնախարար Թամար Բարկալայան, ՅՈՒՆԻՍԵՖ-ի ներկայացուցիչ Հասան Խալիլը, Պատրիարքարանի և World Vision-ի ներկայացուցիչները:
Ըստ Ախալքալաքի և Կումուրդոյի մետրոպոլիտ Նիկոլոզ Պաճուաշվիլիի՝ հարցը, թե ինչպես գոյություն կունենա մանկատունը սկանդալից հետո, լուծվում է:
«Այս փուլում ՅՈՒՆԻՍԵՖ-ի, Առողջապահության նախարարի և Պատրիարքարանի հանձնաժողովը պետք է ծրագիր մշակի, թե ինչպես այս մանկատունը վերածել նույն տարածքում գտնվող փոքր մանկատների: Սա կքննարկվի: Մենք անպայման պետք է տեսնենք, թե ինչ են նրանք մեզ ասում: Ինչ վերաբերում է դատարանի որոշմանը, գիտեք, կարծես թե երեխաներին նրանք առանց այդ էլ դուրս են հանում: Այս սկանդալի պատճառով երեխաները ցանկանում էին տեսնել իրենց ծնողներին և, կարծես, այս պրոցեսն արդեն ընթացքի մեջ է: Տեսնենք, երեկվա դրությամբ 30 երեխա կար մանկատանը: Բանն այն է, որ եթե հանձնաժողովի որոշումից հետո մանկատունը լուծարվի, ապա ընդհանրապես երեխաներին մենք ժամանակավորապես կտեղափոխենք, իսկ հետո չգիտեմ: Պարզապես պետք է սպասել, թե ինչ կասեն նրանք», – ասում է մետրոպոլիտ Նիկոլոզը:
Լրագրողները չեն լքում մանկատան տարածքը՝ սպասելով ու հարցապնդելով բոլորին, ովքեր դուրս են գալիս մանկատան դռներից: Երեխաները նստում են ցանկապատի պատի անկյունում և հետևում այն իրարանցմանը, որի կենտրոնում իրենք են հայտնվել: 14-ամյա մանկատան սանը, որի հետ մենք զրուցեցինք, ասում է, որ իրենք իրենց լավ են զգում մանկատանը, և որ իրենք չեն ուզում որևէ տեղ գնալ: Նրան դուր է գալիս Նինոծմինդայում ապրելը, որտեղ նա մեծացել է դեռ վաղ հասակից: Ըստ երեխաների, մանկատանը դեռ 3-ից 18 տարեկան 30 երեխա կա: Խոսուն երեխաները չեն ցանկանում պատասխանել նեղ անձնական բնույթի հարցերին:
Քրիստինե Մարաբյան
