Վաղ առավոտյան Ախալքալաքի բնակիչները բարձրացան Տավշանկա (Ամիրանիս Գորա), այսօր ախալքալաքցիները նշում են Ծռատոնը:

Չնայած կորոնավիրուսի համավարակին, Ախալքալաքի բնակիչները առավոտյան ժամը 6-ից բարձրացան Տավշանկա լեռը: Տավշանկայի գագաթին կան սրբավայրեր, որտեղ ամեն տարի մայիսի 6-ին ախալքալաքցիներն ուխտագնացության են գնում:

Գոյություն ունի լեգենդ, որ այս օրը ոչ ոք գործ չի անում, վախենալով, որ կծռվի։ Մարդիկ հավատում են, որ հնում շատերը գործ են արել և անմիջապես ձեռքերը, ոտքերը ծռվել են։ Իսկ եթե ստիպված էին որեւէ անհետաձգելի բան անել, ապա, պատժից խուսափելու նպատակով, դրանից անմիջապես հետո մի քիչ գարի էին ցանում։ Հավատում էին, որ ցանած գարին ծուռումուռ է դուրս գալիս՝ իր վրա կրելով Սբ. Գեւորգի պատիժը։

Այս տոնը «կարևոր» է նաև հղիների համար: Ծռատոնին հղի կանանց Ջավախքում արգելում են գործ անել, հատկապես կտրող, ծակող իրեր օգտագործել: Ջավախքում հավաստիացնում են, որ այս օրը, եթե հղի կինը գործ է անում, ապա երեխան ծնվում է նշանով: Ահա, թե ինչու Ջավախքում մայիսի 6-ը բառի բուն իմաստով ոչ աշխատանքային է:

Քրիստինե Մարաբյան