Սուրբ Ծննդյան «Ալիլո» ավանդական երթն այս տարի Ախալքալաքում նշվեց փոքրաթիվ մարդկանցով և առանց տներ այցելելու:

Այսօր՝ հունվարի 7-ին, Վրաստանում ուղղափառ քրիստոնյաները նշում են Քրիստոսի Ծնունդը, այդ թվում՝ Ախալքալաքի ուղղափառ քրիստոնյաները: Առավոտյան հայր Ալեքսանդրի գլխավորությամբ հավատացյալները երթը սկսեցին Ախալքալաքի վրացական եկեղեցուց, շրջեցին քաղաքի փողոցներով ու շնորհավորեցին բնակիչներին:

Ախալքալաքի ուղղափառները 12 տարի է նշում են «Ալիլո» տոնը: Այնուամենայնիվ, այս տարի տոնն անսովոր էր, քչերն էին մասնակցում տոնական երթին, և չէին այցելում բնակիչների տները՝ օրհնելու նպատակով:

Հայր Ալեքսանդրի խոսքով՝ այս տարի կորոնավիրուսի համավարակի պատճառով որոշվել է կրճատել երթի մասնակիցների թիվը:

«Ալիլոյին մասնակցեցին եկեղեցու ծառայողները, և հոգևոր երգեր երգողները: Ընդամենը 10-12 հոգի: Համավարակի պատճառով այս տարի մենք ունենք սահմանափակումներ: Մենք շրջեցինք քաղաքով և շնորհավորեցինք բնակիչներին, ինչպես նաև օրհնեցինք քաղաքը», – ասաց Հայր Ալեքսանդրը: