Ախալքալաքի Սուրբ Խաչ եկեղեցում հավատացյալները նշեցին քրիստոնեական տաղավար տոներից մեկը` Սուրբ Ծնունդն ու Աստվածհայտնությունը:

Այսօր՝ հունվարի 6-ին, ՀԱԵ-ն նշում է եկեղեցական հինգ Տերունի տոներից մեկը` Սուրբ Ծնունդը և Աստվածհայտնությունը (Հիսուս Քրիստոսի մկրտությունը):

Ախալքալաքի հավատացյալները տաղավար տոնը նշեցին Սուրբ Խաչ եկեղեցում: Տոնական Պատարագը մատուցեց Սուրբ Խաչ եկեղեցու հոգևոր հովիվ Տեր Նարեկ քահանա Տիգրանյանը:

Եկեղեցին մարդաշատ էր: Ներկա էին Ախալքալաքի մունիցիպալիտետի Սակրեբուլոյի նախագահ Նաիրի Իրիցյանը, փոխքաղաքապետ Արմեն Մառանգոզյանը:

Պատարագից հետո Տ. Նարեկ Տիգրանյանը օրհնեց ջուրը: Ջրի մեջ ավելացվում է Սրբալույս մյուռոն, ջուրն օրհնվում է աղոթքով:

Հավատացյալները օրհնված ջուրը տուն են տանում: Հավատացյալներն ասում են, որ այն ունի բուժիչ հատկություններ:

Սուրբ Ծննդյան օրերին նաև օրհնում են տները: Հունվարի 7-ին, ինչպես և անմիջապես տաղավար տոնին հաջորդող բոլոր օրերը նվիրվում են ննջեցյալների հիշատակին (Մեռելոց): Սուրբ Պատարագից հետո բոլոր եկեղեցիներում աղոթում են հոգու հանգստության համար, որից հետո մարդիկ այցելում են գերեզմաններ: