Ախալքալաքի մունիցիպալիտետի Դադեշ գյուղի բնակիչները դժգոհում են, որ երկար տարիներ իրենց խոստանում են, որ խմելու ջրի պակասի հարցը շուտով կլուծվի, բայց գյուղում խնդիրը դեռ հրատապ է մնում:
Դադեշ գյուղի բնակիչները դժգոհ են, որ բազմիցս բողոքներից հետո իրենց խնդիրներից ոչ մեկը չի լուծվել: Գյուղում բնակվում է շուրջ 160 ընտանիք: Գյուղը չունի ոչ բնական գազ, ոչ նորմալ ճանապարհ, ոչ էլ ամենակարևորը՝ խմելու ջուր:
Գյուղի բնակիչ Ոսկան Հակոբյանի խոսքով՝ գյուղացիները բազմիցս բողոքել են, դժգոհություն հայտնել, խնդրել, բայց գյուղում ոչինչ չի փոխվել:
«Ասում են ջրի խնդիրը շուտով կլուծվի, տեսնենք ե՞րբ: Մինչև հիմա ոչ մի բան չի արվում», – ասում է նա:
Նույն գյուղի բնակիչ Հակոբ Հակոբյանն ասում է, որ ջրամատակարարման գիծը շատ հին է, խողովակները ժանգից խցանվել են, ուստի և ջուրը գյուղ չի հասնում: Ինչպես նա է պնդում, ջուրը ոչ միայն քչություն է անում, այլև կեղտոտ է:
Ինչպես վստահեցնում են գյուղացիները՝ անցյալ տարի իրենց ասել էին, որ Թբիլիսիից պետք է մասնագետներ գան, նայեն տարածքը, ապա նախագիծ կազմեն, բայց նախագիծը դեռևս պատրաստ չէ:
«ԽՍՀՄ-ի փլուզումից հետո, գրեթե 30 տարի մեր գյուղում միշտ խմելու ջրի պակաս է եղել», – ասում է Դադեշ գյուղի բնակիչ Աբրահամ Դուլբարյանը:
Ինչպես և երբ կլուծվի այս հարցը, մենք փորձեցինք պարզել Դադեշ գյուղում քաղաքապետի ներկայացուցչից՝ Էդգար Թումասյանից: Նրա խոսքով, ներկայումս ընթանում է նախագծի պատրաստման գործընթացը: Նա պնդում է, որ ջրամատակարարման աշխատանքները կսկսվեն հաջորդ տարի՝ 2021 թվականին:
Բրատիսլավ Իգիթխանյան
