Վրաստանին հաջողվել է կանխել համաճարակի արագ աճը, սակայն դա չի նշանակում, որ երկիրը հասել է գագաթնակետին, և առաջիկա օրերին վարակակիրների թիվը կսկսի նվազել: Այս մասին հայտարարել է Թբիլիսիի ինֆեկցիոն հիվանդությունների հիվանդանոցի տնօրեն, պրոֆեսոր Թենգիզ Ցերցվաձեն:

Անցած շաբաթ Հանրային առողջության ազգային կենտրոնի ղեկավարի տեղակալ Պաատա Իմնաձեն հայտարարեց, որ Վրաստանն արդեն գտնվում է կորոնավիրուսային հիվանդության պիկում, և այժմ նրանց հիմնական խնդիրն է համաճարակը սարահարթային հասցնելը: Ցերցվաձեն, ով COVID-19-ի կլինիկական հսկողության խմբի ղեկավարն է, չի կիսում այս գնահատականը:

«Գլխավորն այն է, որ մենք թույլ չենք տվել համաճարակի ողբերգական աճը… Անձամբ ես չեմ կարծում, որ մենք հիվանդության գագաթնակետին ենք հասել և վաղը թվերը կսկսեն նվազել: Այնունամենայնիվ, ես գիտեմ, որ իմ որոշ գործընկերներ այլ կարծիքի են»,- ասել է Ցերվաձեն:

Պրոֆեսորի կարծիքով, համաճարակը Վրաստանում գագաթնակետին կհասնի մեկ շաբաթ անց և կսկսի նվազել մայիսի վերջ: Նա նաև ընդգծել է, որ սա իր անձնական կարծիքն է:

«Մտածում եմ, որ առաջիկա շաբաթվա ընթացքում թվերը կաճեն, բայց դա կլինի օրական մի քանի տասնյակ, ոչ թե մի քանի հարյուր: Այնուհետև մենք կհասնենք գագաթնակետին… Ենթադրաբար, այն կտևի մեկ, երկու, երեք շաբաթ, և հետո համաճարակը պետք է իջնի», – ավելացրել նա:

Վրաստանում կորոնավիրուսային հիվանդության առաջին դեպքը գրանցվել է փետրվարի 26-ին: Մինչև ապրիլի 30-ը հաստատված դեպքերի քանակը 539 է, որոնցից առողջացել է 178 պացիենտ, 6 մարդ մահացել է:

Վերջին մեկ օրում Վրաստանում COVID-19-ի ևս 22 նոր դեպք է գրանցվել: