Վրաստանում կստեղծվի հեռախոսային ծառայության համակարգ, որի օգնությամբ կորոնավիրուսի ախտանիշ ունեցող բոլոր մարդիկ կկարողանան ստանալ բժշկական խորհրդատվություն: Այս մասին լրագրողներին հայտնել է Վրաստանի առողջապահության նախարարի տեղակալ Թամար Գաբունիան:
«Ստեղծվելու է կապի միասնական համակարգ, որը կլինի հեռախոսային և կընդունի բոլոր այն զանգերը, որոնք կկատարվեն «112»՝ տենդի կամ այլ ախտանիշների պատճառով: Փորձառու ընտանեկան բժիշկները նախապես կխորհրդակցեն նրանց հետ: Շատ կարևոր է, որ այդ ընտանեկան բժիշկները հետո կվերահսկեն իրենց շրջանում գտնվող պացիենտների վիճակը, եթե այդպիսի անհրաժեշտություն առաջանա», – հայտարարել է Գաբունիան:
Փոխնախարարը նախաձեռնության մասին հայտարարել է առողջապահության ոլորտի ներկայացուցիչների հետ հանդիպումից հետո: Բանակցությունները տեղի են ունեցել ուշ երեկոյան: Հանդիպմանը մասնակցում էին նաև փորձագետներ և արտակարգ իրավիճակների կառավարման աշխատակիցներ: Հենց այս վերջին գործակալությունն է, որը համակարգում է շտապ օգնության օպերատիվ կառավարման «112» կենտրոնը:
Ավելի վաղ, Վրաստանի քաղաքացիների համար, ովքեր կասկածում են, որ ունեն կորոնավիրուս, Առողջապահության նախարարությունը գործարկել էր իր սեփական «թեժ գիծը»՝ 116 001:
StopCov.ge-ի կառավարության կայքէջի վերջին տվյալների համաձայն, Վրաստանում հաստատվել է կորոնավիրուսով վարակման հաստատված 77 դեպք: Ապաքինվել է 10 հիվանդ, ևս երկու հիվանդ՝ Ավստրիայի քաղաքացիները, ցանկություն են հայտնել վերադառնալ հայրենիք: Կարանտինի պայմաններում մնում է 4346 հոգի, իսկ հիվանդանոցում բժիշկների հսկողության տակ՝ 247 հոգի:
