Նինոծմինդա-Օրլովկա ճանապարհին սկսվել են վերականգնողական աշխատանքները: Կասֆալտապատվի 7 կմ. 498 մետր երկարությամբ ճանապարհահատվածը:

Աշխատանքներն սկսվել են մի քանի օր առաջ՝ Նինոծմինդայի ծայրամասից:

Տենդերը հայտարարվել էր Վրաստանի ավտոմոբիլային ճանապարհների վարչության ենթակառուցվածքների և զարգացման նախարարության կողմից: Նախնական գումարը կազմել է 4 722 354 լարի: Մրցույթը հաղթել է «Արալի» ընկերությունը՝ 4 627 900 լարիով:

Ճանապարհաշինարարական աշխատանքներն իրականացնող ընկերությունը պարտավոր է 11 ամսվա ընթացքում ավարտել շինարարական աշխատանքները, այսինքն՝ մինչև 2020 թվականի ավարտը:

Ասֆալտապատ ճանապարհը կունենա երկու տարվա երաշխիքային ժամկետ:

Տենդերային փաստաթղթերի համաձայն՝ կվերականգնվի Նինոծմինդայից մինչև Օրլովկա գյուղ տանող 7 կմ 498 մետր երկարությամբ ճանապարհահատվածը:

Հիշեցնենք, որ Նինոծմինդա-Ժդանովական ճանապարհը գտնվում էր անմխիթար վիճակում, 2018-2019 թվականների ընթացքում վերականգնվել է ճանապարհի Օրլովկա-Ժդանովական հատվածը (Հայաստանի Հանրապետության սահման): Այդ ժամանակ շինարարական աշխատանքներն իրականացրել է «Սաքմիլսադենմշենի» ընկերությունը՝ 13 000 800 լարիի չափով, իսկ կապալառուն «Ջավախ Ավտո Գզա»-ն էր: