Կաբելի (կանատնի) գործարանի շենքերի բնակիչները պտտահողմից հետո ամեն անձրևոտ օր կտուրներում են անցկացնում փորձելով վրաններով պաշտպանել իրենց բնակարանները անձրևից, քանի որ փոթորկից հետո կտուրը զրկվել է ծածկաշերտից։ Դեռևս պարզ չէ, թե արդյո՞ք տեղական իշխանությունները կփոխհատուցեն բնական աղետի վնասները: Այժմ ընթանում է վերանայման երկար ու ձգձգված պրոցեսը։
jnews.ge-ի խմբագրություն դիմեցին կաբելի գործարանի շենքերի բնակիչները՝ խնդրանքով լուսաբանել հիմնախնդիրը, որի առաջ են կանգնել 10 օր առաջ Ախալքալաքում տեղի ունեցած պտտահողմից հետո։
Կաբելի գործարանի շենքերը գտնվում են Ախալքալաքից դուրս, հարավային մասում։ ԽՍՀՄ-ի փլուզումից հետո շենքերի հիմնախնդիրներով զբաղվող չկար և տները աստիճանաբար դարձան վթարային։ Սակայն մայիսի 22-ի տորնատոի ուժեղ տարափից ու կարկուտից հետո իրավիճակը ավելի վատացավ։ Շենքերը հայտնվեցին տարափի էպիկենտրոնում, ուժեղ քամին իր ճանապարհին հանդիպող ամեն ինչ ոչնչացրեց, պոկելով շիֆերային ծածկույթը ճզմելով դրանք անձեռոցիկի նման, փշրելով պատուհաններ (ինչպես նաև եվրո պատուհաններ), բարձրացնելով ու ոլորելով երկաթե տարաներն ու վագոնները, տարափը ներխուժում էր բնակարաններ ու նախասրահներ ՝ վախեցնելով բնակիչներին։
Տարափից հետո բնակիչները ինչքան կարողացել հավաքել էին բակը նրբատախտակներով (ֆաներա), թիթեղներով ծածկել էին մուտքերի պատուհանները։ Փշրված շիֆերներից մաքրել էին պատշգամբներն ու մուտքերը, շատերը ինքնուրույն փոխել էին սեփական բնակարանների պատուհանները։
Սակայն դրանով չսահմանափակվեցին բնակիչների արկածները։ Տորնադոից հետո սկսված կարկուտն ու հորդ անձրևը ստիպեցին բնակիչներին գիշերով բարձրանալ կտուր և ողջ գիշեր ջրամաններով և վրաններով պաշտպանել սեփական բնակարանները։ Շարունակական անձրևները ստիպեցին բնակիչներին դիմել Ախալքալաքի շրջանային վարչություն օգնության համար։
«Նրանք (ինֆրաստրուկտուրայի բաժնի Ախալքալաքի շրջանային Վարչության աշխատակիցները) մեզ ասացին, գնացեք և ինչպես ուզում եք վերանորոգեք։ Սովորական պայմաններում չենք ուզում, որ փոխեն տանիքը: Սա առանձնահատուկ դեպք է, բնական աղետ: Մենք չենք ասում եկեք և ամեն ինչ փոխեք: Թող մենակ կտուրը փոխեն, որպեսզի մարդիկ անձրևների ժամանակ կտուրում չգիշերեն։ Հարցն այն է, որ խոսքը վերանորոգման մասին չէ, այստեղ ամեն ինչ փշրված է։ Նրանք գրանցեցին, որ վնասը 70% է կազմում։ Վթարային շենք էր տարափից հետո ընդհանրապես վթարային դարձավ», – ասաց բնակիչներից մեկը։
Բնակիչների խոսքերով, նրանք վրաններով են ծածկում շենքի կտուրը: Սակայն կտուրի մեծ մասը մնում է բաց, հիմնականում անբնակելի բնակարանների մասը։ Ջուրը ներծծվել է բնակարան ու հասել է մինչև առաջին հարկ։
Դիմեցինք Ախալքալաքի շրջանային վարչություն տեղեկանալու, թե ինչ օգնություն է հատկացրել տեղական իշխանությունները բնական աղետից տուժված բնակիչներին, որի համար տեղական բյուջեում էական գումար է նախատեսված։ Սակայն մեզ պատասխանեցին, որ այդ հարցով պատասխանատուն գտնվում է Թբիլիսիում։
Մինչ տեղական իշխանությունները որոշում են օգնության հարցը, բնակիչներին մնում է աղոթել, որ անձրև չտեղա։
Քրիստինե Մարաբյան
