Բալխո գյուղի հանրակրթական դպրոցին կից նոր երկու դասասենյակ է կառուցվում: Շինարարության ընթացքին և առհասարակ դպրոցին վերաբերող Jnews-ի հարցերին դպրոցի տնօրենը հրաժարվեց պատասխանել, պահանջելով գրավոր թույլտվություն:

Վրաստանի Կրթության և գիտության նախարարությունը Ախալքալաքի շրջանի Բալխո գյուղի կիսաքանդ 9-ամյա դպրոցում նոր դասասնեյակներ է կառուցում, որպեսզի երեխաները մեկ հերթափոխով միջնակարգ կրթություն ստանան: Jnews-ը որոշեց հենց տեղում ծանոթանալ շինարակական աշխատանքների ընթացքին, սակայն դպրոցի տնօրեն՝ Աշոտ Կիրակոսյան հրաժարվեց պատասխանել մեր հարցերին, պատճառաբանելով որ նախարարությունից միայն գրավոր դիմումի դեպքում կպատասխանի:

Իսկ ԿԳ նախարարությունում նշում են, որ իրենք գրավոր թւոյլտվություն չեն տալիս և լրագրողները կարող են դպրոց գնալ և հարցեր տալ, եթե չեն խանգարում կրթական գործընթացին: Մենք Բալխո գյուղի հանրակրթական դպրոց այցելեցինք օգոստոսի 24-ին, այսինքն դպրոցական արձակուրդի ժամանակ:

Աշոտ Կիրակոսյանը նույնիսկ հրաժարվեց դպրոցի աշակերտների թիվն ասել և մեր յուրաքանչյուր հարցին պատասխանում էր՝ «Մինիստրությունից գրավոր դիմում ունենաք, կպատասխանեմ»:

Հավելենք, որ Բալխոյի դպրոց է հաճախում 60 աշակերտ: 9-ամյա կրթարանը ընդամենը 7 դասասենյակ ունի և ստիպված դասասենյակների սակավության պատճառով երկու հերթափոխով են երեխաները դպրոց հաճախում:

Երկու դասասենյակների ավելացման շինարարական աշխատանքներն ընթացքի մեջ են: Մեր այցի ժամանակ տեսանք, որ շինարարները պատերը, տանիքը և որոշ բետոնապատման աշխատանքներ արդեն ավարտին են հասցնում:

Արդյո՞ք նոր ուսումնական տարում այս գյուղի երեխաները դպրոց կհաճախեն մեկ հերթափոխով, թե՝ ոչ, կարելի է միայն ենթադրել:

Ավելացնենք, որ Բալխո գյուղի դպրոցի ավարտական դասարանների աշակերտները հաճախում են հարևան Բուղաշեն գյուղի նորակառույց դպրոց:

Աղունիկ Այվազյան